Kandidati për kryetar komune nga VMRO-DPMNE për Komunën e Krushevës, Niko Çoneski, theksoi se nevojiten ndryshime dhe një plan i qartë pune për Krushevën, sepse siç tha komuna është pa drejtim, pa vizion dhe me borxhe e probleme të pazgjidhura në shumë fusha. Ai tha se ka program që ofron zgjidhje afatgjata për ajër të pastër, furnizim me ujë, arsim dhe zhvillim.
“Krusheva jonë, krenaria e Maqedonisë, sot është një komunë pa drejtim, pa ide, pa vizion. Kemi një komunë që po mbytet në borxhe. Sot Krusheva është një komunë me shumë probleme, që nga kushtet themelore për jetesë, si uji, ajri i pastër dhe mjedisi i pastër jetësor, deri te arsimi dhe zhvillimi. Jeta kulturore në Krushevë, e cila dikur ishte sinonim i gjallërisë dhe traditës, sot po zbehet ngadalë, e lënë pa mbështetje dhe pa vizion për të ardhmen. Prandaj, ne ofrojmë një program që nuk është listë premtimesh boshe. Programi ynë është një udhërrëfyes për drejtimin që do të ndjekim, por edhe një fjalë e dhënë me përgjegjësi që do ta mbajmë”, tha Niko Çoneski, kandidat i VMRO-DPMNE-së për Krushevën.
