Inspektorati Policor i Kosovës nuk e ka marrë seriozisht autorizimin e Prokurorisë së Shtetit, përmes të cilit i është kërkuar hetim i mëtutjeshëm për të dyshuarit policin Avni Berisha e shefin e Krimeve Ekonomike, Nazim Sahiti. Asnjë lëvizje nuk ka bërë ky institucion prejse ka marrë autorizimin nga Prokuroria, përmes të cilit përveç Avni Berishës edhe Nazim Sahiti cilësohet si i dyshuar
Por edhe Prokuroria e Shtetit të premten ka mohuar ndonjë hetim për Sahitin. Nuk e kanë komentuar autorizimin e ditës se enjte, ku Sahiti cilësohet si i dyshuar.
Në dokumentin në të cilin ka pasur qasje “Koha Ditore”, e që është me nënshkrim të prokurores se rastit Rukije Shasivari, si Berisha edhe Sahiti janë në cilësinë e njëjtë.
“Autorizim… që të ndërmerrni veprimet përkatëse hetimore lidhur me rastin numër 2017-AB-4069, të datës 30.12.2018 me dyshim të kryerjes së veprës penale. Meqenëse në këtë rast penal të dyshuar janë zyrtarët policor Avni Berisha dhe Nazim Sahiti, ju autorizojmë që të ndërmerrni të gjitha veprimet hetimore konform dispozitave ligjore”, thuhet në këtë dokument të cilin e ka parë gazeta.
Gazeta Express ka biseduar me Nazmi Sahitin për incidentin dhe i njëjti ka thënë se motivi pse kishte pasur mosmarrëveshje ndërmjet Mustafës e Berishës ishte akuza e drejtorit të Valës se polici e kishte fotografuar në një lokal.Sahiti ka thënë se nuk ka parë përleshje por vetëm se njëri shok i Mustafës ishte në shpinën e kolegut të tij.
Më 30 dhjetor, drejtori i Valës, Agron Mustafa, pati njoftuar se është sulmuar nga dy zyrtarë të Policisë së Kosovës, njëri prej tyre Nazim Sahiti kurse tjetri i njohur si “Tarkani”./GazetaExpress/
