Lideri i Aleancës për Ardhmërinë e Kosovës, Ramush Haradinaj ka komentuar raportin zyrtar të autopsisë për vdekjen e aktivistit të Lëvizjes “Vetëvendosje”, Astrit Dehari, i cili ndërroi jetë dy javë më parë në burgun e Prizrenit.
Në një prononcim për “Indeksonline”, Haradinaj ka pohuar se ka probleme rreth të të besuarit në institucionet e Kosovës, mirëpo, sipas tij, është vështirë të komentohen provat që dalin nga ekspertiza, deri sa ato nuk kundërshtohen nga prova të tjera.
“Nëse nuk ka të gjetura tjera ose situate tjera zyrtare që do ta kundërshtonin apo do ta mohonin, unë e kam të vështirë të jap komente tjera që vijnë nga ekspertiza. Ka realisht plot dëmtime në besim ose në besueshmërinë ndaj institucioneve të cilat janë problem. Mirëpo në rastin konkret është vështirë të japin komente ata që nuk nuk janë të ekspertizës”, është shprehur ai.
Haradinaj ka thënë se ekzistojnë rrugë ligjore që mund të ndiqen nëse ka paqartësi rreth një çështje.
“Unë jam për rrugë ligjore, për çfarëdo paqartësie apo për çfarëdo çështje që nuk mendohet që është e drejtë ka rrugë ligjore që mund të që mund të ndjeken, mirëpo komentimi në këto raste është bukur problem”, ka thënë tutje ai.
Ndryshe, Prokuroria e Shtetit, respektivisht kryeprokruroi i Prokurorisë Themelore të Prizrenit, Sylë Hoxha duke u bazuar në raportin e autopsisë së Mjekësisë Ligjore në Prishtinë, ka thënë se Dehari ka kryer vetëvrasje
Ndërsa këtë raport nuk e ka vlerësuar si të besueshëm avokati i familjes Dehari, Tomë Gashi, kurse deputeti i Vetëvendosjes, Rexhep Selimi ka thënë se krejt çka duhet thënë rreth kësaj, do të thuhet në seancën e Kuvendit të Kosovës.
