Po investonte në Shqipëri/ Princit të mafies i sekuestrohen qindra mln euro

Sipërmarrësit kalabrez Antonio Gallo, i arrestuar si pjesë e grupit mafioz italian Ndragheta, i janë sekuestruar të  dielën të gjitha paratë  cash që kishte në shtëpi, sipas medieve italiane. Ato bëjnë me dije se ende nuk kanë  mbaruar numërimin e parave të  tij të shumta, por ato kapin vlerën e qindra milionë eurove.

Prokurori Nicola Gratteri tha se i janë gjetur dhe sekuestruar makina luksoze e ora Rolex me vlerë qindra milionë  euro.

“Ky hetim është sinteza e asaj që kemi thënë për dekada me radhë”, tha prokurori i operacionit, Nicola Gratteri.

Figura kryesore e Ndraghetas është Antonio Gallo, i njohur dhe me nofkën ‘Princi’. Ai ishte personi që kishte krijuar kontakte të ngushta në fushën e ligjit dhe politikës. Dhe, kësisoj Ndrangheta ka zgjeruar veprimtarinë e saj sipërmarrëse pa masë.

Ai ishte një sipërmarrës mesatar, por kjo dëshirë për t’u rritur më tej e çoi atë në rajonin italian ‘Reggio Calabria’, për t’i kërkuar familjeve të Ndranghetas për të organizuar fushatën elektorale të Talarico-s. Franco Talarico ishte këshilltar rajonal në Reggio Calabria, i cili përfundoi në arrest shtëpie në 21 janar.

Arrestimi i dhjetra anëtarëve të grupit italian mafioz të ‘Ndrangheta-s, nxorri në pah lidhjen e tyre me zyrtarë të Bashkisë Tiranë e qeverinë Rama dhe përfshirjen e tyre në tendera korruptivë e leje ndërtimi.

E gjithë skema e pastrimit të parave të mafias italiane në Shqipëri dyshohet se kap vlerën e 250 milionë eurove.

Dosja e plotë e përgjimeve është mbi 1000 faqe dhe pritet që në ditët në vijim të publikohen pjesë të tjera të saj./EXIT