Kancelari austriak, Sebastian Kurz, ka bërë të ditur se ka dhënë dorëheqje në një përpjekje për të shuar një krizë qeveritare të shkaktuar nga njoftimi i prokurorëve se ai është një objektiv i një hetimi korrupsioni.
Kurz tha se ai ka propozuar që Ministri i Jashtëm, Alexander Schallenberg, të jetë zëvendësuesi i tij, shkruan Euronews, transmeton Klankosova.tv.
Vetë Kurz planifikon të bëhet kreu i grupit parlamentar të Partisë Popullore Austriake.
Prokurorët kundër korrupsionit në Austri të mërkurën kanë bërë të ditur se kancelari Sebastian Kurz është duke u hetuar nën dyshimin për ryshfet dhe shkelje të besimit.
Hetimi është hapur për shkak se dyshohet që Kurz në vitin 2016 derisa ishte ministër i Jashtëm, dhe kërkonte të bëhej udhëheqës partie, dhe më vonë kur u bë kancelar, Ministria e Financave e drejtuar nga konservatorët pagoi reklamat në një gazetë në këmbim të sondazheve dhe mbulimit të favorshëm për atë.
