Ministri i Punëve të Jashtme, Bujar Osmani, në kuadër të Konferencës së Sigurisë në Mynih, ka zhvilluar një takim bilateral me homologun e tij, ministrin e Punëve të Jashtme, Bashkimit Evropian dhe Bashkëpunimit të Mbretërisë së Spanjës, Jose Manuel Albares.
– Advertisements –
Sipas MPJ-së, ministrat diskutuan për perspektivat evropiane të vendit, zhvillimin e bashkëpunimit ekonomik dhe dypalësh dhe forumet multilaterale të veprimit të përbashkët, veçanërisht për bashkëpunimin e OSBE-së në fokus të presidencës së ardhshme të Maqedonisë së Veriut në vitin 2023.
Osmani e njoftoi Albaresin për procesin e hapur për ndërtimin e besimit me Republikën e Bullgarisë, i cili po zhvillohet në frymë pozitive dhe nga i cili pritet një formulë e arsyeshme evropiane që do të zhbllokojë fillimin e negociatave për anëtarësim të Republikës së Maqedonisë së Veriut.
Të dy ministrat shkëmbyen mendime mbi situatën në Ukrainën lindore, duke shprehur shqetësimin për situatën e përshkallëzuar të sigurisë. Në të njëjtën kohë, ata theksuan mbështetjen e qartë për sovranitetin, integritetin territorial dhe paprekshmërinë e kufijve të Ukrainës dhe bënë thirrje për një de-përshkallëzim të menjëhershëm të situatës.
“Osmani dhe Albares konkluduan se veçanërisht e rëndësishme për sigurinë në hapësirën euroatlantike është qasja e koordinuar e NATO-s dhe BE-së, të cilat bazohen në vlera të barabarta dhe përkushtim të barabartë për paqen dhe sigurinë në nivel global. Ministrat u zotuan për bashkëpunim të ngushtë dhe koordinim të vazhdueshëm për tema me rëndësi të përbashkët”, thuhet në njoftimin e Ministrisë së Jashtme.
