Një anije e ngarkuar me 23 kamionë me ndihma humanitare për në Liban u nis nga provinca jugore Mersin e Türkiye-s, raporton Anadolu Agency (AA).
Sipas zyrës së guvernatorit të provincës, flota me 23 kamionë që transportojnë 512 tonë ushqime u përgatit nën koordinimin e Autoritetit Turk të Menaxhimit të Fatkeqësive dhe Emergjencave (AFAD) me udhëzimet e presidentit Recep Tayyip Erdoğan.
Duke folur në një ceremoni me rastin e nisjes, zëvendësguvernatori Ibrahim Küçük tha se kjo anije është e katërta e dërguar si pjesë e një fushate ndihme për Libanin.
Duke vënë në dukje se populli libanez po përballet me vështirësi në plotësimin e nevojave, Küçük tha se shpreson se ndihma do të jetë e dobishme.
Që nga fundi i vitit 2019, Libani është përballur me një krizë të rëndë ekonomike, duke përfshirë një zhvlerësim masiv të monedhës, si dhe mungesën e karburanteve dhe materialeve mjekësore.
Pothuajse 80 për qind e popullsisë së Libanit tani jeton nën kufirin e varfërisë, me 36 për qind në varfëri ekstreme, sipas vlerësimeve të OKB-së.
