Gjykata Themelor e Ferizajt ju ka caktuar masën e paraburgimit prej 1 muaji shtatë të dyshuarve: Berat Lahu, Shukri Shabani, Gani Berisha, Sami Sinani, Labinot Vitia, Gëzim Sinani dhe Salih Sinani për rastin “Brezovica”.
Të pandehurit Gani Berisha dhe A. Ç. dyshohen për shkak të veprës penale “Marrja e ryshfetit. L.V dyshohet për veprën penale “Dhënia e ryshfetit”. Ndërkaq G.S dhe S.S2 dyshohen për veprat penale në vazhdim “Fajdeja në bashkëkryerje”. O ashtu G.S po dyshohet edhe për vepra tjera penale si “Dhënia e ryshfetit”, “Ushtrimi i ndikimit” dhe “Pengimi i të provuarit apo procedurës zyrtare”.
“Gjyqtari i procedurës paraprake i Departamentit për Krime të Rënda kërkesën e prokurorit të shtetit për caktimin e masës së paraburgimit kundër shtatë (7) të dyshuarve: B.L., SH.SH., G.B., S.S.1, L.V., G.S., dhe S.S.2, e ka aprovuar si të bazuar dhe të njëjtëve i`u është caktuar masë e paraburgimit në kohëzgjatje prej një (1) muaji për secilin veç e veç, konform dispozitave ligjore të Kodit të Procedurës Penale të Republikës së Kosovës, për shkak të dyshimit të bazuar se të pandehurit kanë kryer veprat penale të përshkruara më lartë”- bën të ditur gjykata./Ilirjana Hoti, kallxo.com
Dosja Brezovica deri më tani ka dërguar në burg mbi 30 persona përfshirë zyrtarë të lartë shtetërorë përgjegjës për ndërtimin e mbi 500 vilave dhe hoteleve në zonën e mbrojtura të maleve të Sharrit.
Dosja ngritë dyshime për një aferë ku besohet të jenë kërkuar mbi 20 milion euro mitos nga zyrtarë e kompani të ndryshme të ndërtimit.
