Besimtarët e krishterë kremtojnë këtë të dielë Krishtlindjen, ngjarjen më të rëndësishme në kalendarin e festave të tyre fetare pas Pashkës.
Në Tiranë, mesha e Krishtilindjes për besimtarët katolikë u mbajt në mesnatë në Katedralen e Shën Palit dhe u drejtua nga kreu i kryedioqezës Tiranë-Durrës, Arjan Dodaj, i cili në fjalën e tij bëri thirrje për solidaritet me të pamundurit dhe reflektim për më shumë mirësi në këto kohë të vështira.
Arjan Dodaj: Kjo është festa e pajtimit mes Krijuesit dhe njerëzimit të shthurur, të humbur dhe rebel që pavarësisht brutalitetit dhe dhunës, Krijuesi nuk braktis, por i dërgon birin e tij, Princin e Paqes, Jezu Krishtin.
Besimtarët ortodoksë u mblodhën mëngjesin e së dielës në Katedralen Ngjallja e Krishtit, teksa kryepeshkopi Anastas Janullatos drejtoi meshën e posaçme.
Anastas Janullatos: Ata që banojnë dhe që ndodhen në këtë qytet, të gjithë ata që marrin pjesë, i kujtoftë Zoti Perëndi në Mbretërinë e tij.
Sipas besimit ortodoks dhe katolik, në këtë ditë ka ardhur në jetë nga Virgjerësha Mari, shpëtimtari Jezu Krishti, biri i Perëndisë. Ajo simbolizon unitetin dhe ngrohtësinë e të qenit të gjithë pranë familjes.
Tv Klan
