Papa Françesku ka shkarkuar peshkopin e Teksasit Joseph Strickland, një kritik i ashpër që ka vënë në pikëpyetje udhëheqjen e Papës në kishën katolike. Vatikani tha se peshkopi do të “lirohet” nga detyrat e tij si rezultat i hetimeve në dioqezën e tij të Tyler. Peshkopi Strickland është një zë udhëheqës në një degë të katolicizmit amerikan që është kundër reformave të Papës.
Largimi i tij vjen pasi Françesku foli për “prapambetjen” e disa udhëheqësve të kishës katolike të SHBA. Peshkopi Strickland ka nisur një sërë sulmesh ndaj përpjekjeve të Papës për të përditësuar pozicionin e Kishës për çështjet sociale dhe përfshirjen, duke përfshirë abortin, të drejtat transgjinore dhe martesat e të njëjtit seks.
Në korrik, ai paralajmëroi se shumë “të vërteta themelore ” të mësimeve katolike po sfidoheshin, duke përfshirë ato që ai i quajti përpjekjet për të “minuar” martesën “siç është krijuar nga Zoti” që janë vetëm midis një burri dhe një gruaje. Ai kritikoi si “të çrregullta” përpjekjet e atyre që “refuzojnë identitetin e tyre të pamohueshëm biologjik të dhënë nga Zoti”.
Letra e tij sugjeronte se përpjekjet për të ndryshuar “atë që nuk mund të ndryshohet” do të çonin në një përçarje të pakthyeshme në Kishë. Ata që kërkojnë ndryshim, paralajmëroi ai, “janë skizmatikët e vërtetë”. Peshkopi Strickland ishte nën hetim nga Vatikani dhe më parë kishte refuzuar mundësinë për të dhënë dorëheqjen dhe në një letër të hapur në shtator sfidoi Papën që ta shkarkonte atë.
