Kina tregon një interes të shtuar për thellimin e bashkëpunimit me Maqedoninë e Veriut në disa fusha. Megjithatë, është evidente se autoritetet kineze vazhdimisht shkelin të drejtat dhe liritë e njeriut në vendin e tyre, dhe nga ana tjetër, Maqedonia e Veriut përmendet si shtet në të cilin diversiteti etnik dhe fetar gëzon shumicën e të drejtave dhe lirive të garantuara.
Dënimi i Kinës për operacionet e Izraelit në Rafah, të cilat i konsideron si shkelje të ligjit ndërkombëtar, konsiderohet si dëshmi e cinizmit të Kinës.
Mediat maqedonase së fundi raportojnë për njoftimin e Ministrisë së jashtme kineze, e cila dënoi veprimet e Izraelit në Rafah kundër viktimave civile dhe për shkelje të së drejtës ndërkombëtare.
Nuk kontestohet përmbajtja e reagimit të diplomacisë kineze ndaj Rafahut, por kontestohet integriteti i shtetit kinez që përfaqëson atë qëndrim. Kina si shtet i cili e mëson Izraelin për respektimin e ligjit ndërkombëtar, vet shkel të drejtat dhe liritë e qytetarëve të saj me origjinë ujgure në mënyrën më brutale.
Akuza të tilla të rënda vijnë nga Zyra e Komisionerit të Lartë të Kombeve të Bashkuara për të drejtat e njeriut, e cila në gusht 2022 lëshoi një raport të ashpër që zbuloi se shkeljet e të drejtave të qeverisë kineze ndaj ujgurëve dhe myslimanëve të tjerë turq në Xinjiang “mund të përbëjnë … krime kundër njerëzimit”.
Vitin e kaluar, Komisioneri i Lartë i OKB-së për të drejtat e njeriut, Volker Turk pranoi nevojën për “përcjellje konkrete” të konkluzave të raportit. Megjithatë, ai ende nuk ka informuar Këshillin e OKB-së për të drejtat e njeriut mbi raportin ose monitorimin e vazhdueshëm të situatës në Xinjiang nga zyra e tij.
“Në lidhje me Kinën, ne kemi hapur kanale komunikimi me një sërë aktorësh për të ndjekur çështje të ndryshme të të drejtave të njeriut, duke përfshirë mbrojtjen e pakicave si tibetianët, ujgurët dhe grupe të tjera. Në rajonin e Xinjiang-ut, Zyra ime ka dokumentuar shqetësime serioze – veçanërisht ndalime arbitrare në shkallë të gjerë dhe ndarje të vazhdueshme familjare – dhe ka bërë rekomandime të rëndësishme që kërkojnë ndjekje specifike. Ne jemi gjithashtu të shqetësuar për kufizimet e rënda në hapësirën civile në përgjithësi, duke përfshirë ndalimin arbitrar të mbrojtësve të të drejtave të njeriut dhe avokatëve; dhe ndikimin e Aktit të Sigurisë Kombëtare në Hong Kong”, tha komisioneri Turk në raport.
Si krejtësisht e kundërta e Kinës, Maqedonia e Veriut si një vend që aspiron për anëtarësim në BE dhe një vend me komunitete të ndryshme etnike dhe fetare, i kushton rëndësi serioze respektimit të të drejtave dhe lirive të njeriut. Dhe në vetë sondazhet e opinionit publik, shumica e qytetarëve të Maqedonisë së Veriut e konsiderojnë Kinën shtet autoritar në të cilin nuk respektohen të drejtat e njeriut dhe në të cilin nuk ka demokraci dhe pluralizëm.
Paralelisht me përpjekjet intensive të Kinës për të paraqitur një imazh pozitiv në shoqërinë maqedonase për arritjet e saj ekonomike dhe teknologjike, Partia Komuniste e Kinës me mjeshtëri përpiqet të fshehë mosrespektimin e të drejtave dhe lirive të njeriut.
