Më 7 mars 2024, disa media botuan informacion të pavërtetuar se Mickoski u paralajmërua në Kongresin e Partisë Popullore Evropiane në Bukuresht si lider i opozitës në Maqedoni, e jo në Maqedoninë e Veriut.
Për shembull, portali Expres.mk botoi titullin: “Befasi – Si u prit Mickoski në kongresin e EPP (VIDEO)” me pretendimin: “Kryetari i VMRO-DPMNE-së, Hristijan Mickoski, në kongresin e Partisë Popullore Evropiane (EPP) në Bukuresht u prit dhe u paralajmërua si lider i opozitës në Maqedoni, pa e përmendur fjalën e Veriut”.
Edhe portali Republika e botoi titullin “Për Kongresin e PPE nuk ekziston e Veriut! Mickoski paralajmërohet si lider i opozitës në Maqedoni”. Përmbajtje të ngjashme transmetuan edhe portali Plusinfo, portali Pressing TV, si dhe portali Markukule. Në shumicën e shkrimeve thuhej: “Fjala e Veriut nuk ekziston në këtë Kongres!”, ndërsa në shkrime kishte edhe një video, në të cilën pretendohet se Mickoski është paralajmëruar si “lider i opozitës në Maqedoni”. “I dëshirojmë mirëseardhje në skenë Hristijan Mi(c)kovskit, lider i opozitës në Maqedoni”, dëgjohet në këtë video.
Mirëpo, çfarë vërteton kontrolli i fakteve? Ja çfarë shihet dhe dëgjohet në videon zyrtare nga Kongresi i PPE-së gjatë prezantimit të Mickoskit: “I dëshirojmë mirëseardhje në skenë Hristijan Mi(c)kovskit, lider i opozitës në Maqedoninë e Veriut”.
Nga videoja zyrtare bëhet e qartë se Mickoski është prezantuar si “lider i opozitës në Maqedoninë e Veriut”, dhe se videoja e shpërndarë nga portalet është ndryshuar në mënyrë digjitale. Edhe në programin zyrtar të kongresit të Partisë Popullore Evropiane në Bukuresht, shkruan: “Hristijan Mickoski (Maqedonia e Veriut)”.
Prandaj, pohimet se Mickoski u paralajmërua në kongresin e PPE si lider i opozitës në Maqedoni dhe se “Fjala e Veriut nuk ekziston në këtë Kongres!”, mund të vlerësohen si dezinformata. Edhe ky rast tregon se mediat duhet të kontrollojnë vazhdimisht faktet dhe videot, që të mos bien pre e dezinformatave propagandistike partiake.
