Ministri i Financave, Avdullah Hoti dhe menaxheri i Bankës Botërore për Kosovë, Marko Mantovanelli, kanë nënshkruar sot dy marrëveshje për kredi në vlerë të përbashkët prej afro 34.3 milionë euro për realizimin e dy projekteve, që synojnë zhvillimin e sektorit privat dhe krijimin e vendeve të reja të punës në Kosovë.
Me këtë rast ministri Avdullah Hoti theksoi se pas kompletimit të të gjitha procedurave ligjore sapo nënshkruam me Bankën Botërore dy marrëveshje për kredi për realizimin e dy projekteve të identifikuara si parësore nga Qeveria e Republikës së Kosovës, Projektin për Konkurrueshmërinë dhe Gatishmërinë për Eksport dhe Financimin Shtesë për Projektin për Bujqësinë dhe Zhvillimin Rural.
“Projekti i parë ka për qëllim avancimin e legjislacionit për tregti si dhe krijimin e një ambienti të përshtatshëm për eksporte me standarde ndërkombëtare. Realizimi i Projektit në fjalë do të ndikojë drejtpërdrejt në rritjen e konkurueshmërisë së produkteve dhe shërbimeve që eksportohen, ofrohen nga tregu i Kosovës”, shtoi ministri Hoti.
Ndërsa sa i përket marrëveshjes së dytë, ministri Avdullah Hoti bëri të ditur se kjo marrëveshje ka të bëjë me sektorin e bujqësisë dhe ka për qëllim vazhdimin e financimit për grantet e bujqve, si dhe për rehabilitimin e kanaleve në skemat e ujitjes “Radoniqi” dhe “Dukagjini”. Objektivat e Projektit janë që ta ndihmojnë MBPZHR-në që ta përmirësojë produktivitetin dhe qasjen në tregje të përfituesve të Projektit në nënsektorët e hortikulturës dhe blegtorisë në Kosovë, si dhe ta konsolidojë kapacitetin institucional të Ministrisë së Bujqësisë, Pylltarisë dhe Zhvillimit Rural”.
Të dyja marrëveshjet kanë vlerën afro 34.3 milionë, ndërsa kohëzgjatja 25 vjet maturitet, ku 5 vjet janë grejs-periudhë, kurse 20 vjet janë amortizim me 40 këste gjysmëvjeçare. Norma e interesit 0,45% në shumën e tërhequr, tarifa e shërbimit 0,75% në shumën e tërhequr, si dhe tarifa e zotimit 0,5% vjetore në shumën e patërhequr”, shtoi ministri Hoti. Ndërsa menaxheri i Bankës Botërore për Kosovë, Marco Mantovanelli, u fokusua në kontributin e projekteve të reja për bërjen e rritjes ekonomike të Kosovës, të bazuar në produktivitet më të lartë brenda vendit dhe me konkurrueshmëri më të lartë jashtë vendit. “Financimi për këto projekte është pjesë e strategjisë së Grupit të Bankës Botërore, që synon t’i ndihmojë Kosovës në lëvizjen drejt një rritjeje ekonomike më të qëndrueshme, të orientuar kah eksporti, ashtu që qytetarët e saj të kenë më shumë mundësi për një jetë më të mirë”, tha menaxheri i Bankës Botërore për Kosovë, Marco Mantovanelli.
Dy kreditë janë dhënë nga Asociacioni Ndërkombëtar (IDA) për Zhvillim i Grupit të Bankës Botërore. Kosova është ende përfituese e financimit koncesional (të butë) nga IDA, që jepet me kushte koncesionale me normë interesi zero ose afër zeros, si dhe me periudha të gjata të kthimit të kredisë. Marrëveshjet pas aprovimit në Qeveri do të procedohen për ratifikim në Kuvendin e Republikës së Kosovës.
