Sakte.net / e Shtunё 24 Shtator / 21:42
Përfaqësuesit e Bashkimit Europian premtuan se do të gjejnë zgjidhje për të t’i dhënë fund sagës së bllokimit të mijëra refugjatëve që kanë mbetur të bllokuar në Greqi.
Kancelari austriak Christian Kern, ai që mblodhi në samitin e Vjenës kryeministrat e Shqipërisë, Bullgarisë, Kroacisë, Greqisë, Hungarisë, Rumanisë, Serbisë dhe Maqedonisë me përfaqësuesit e tjerë të Unionit, dha edhe konkluzionet e bisedimeve që u zhvilluan me dyer të mbyllura.
“Ne kemi nevojë për të rimarrë në duar kontrollin e kufijve tanë të jashtëm. Ne dhe jo trafikantët jemi ata që duhet të vendosim se kush duhet të hyjë në Europë. Gjithashtu, prioritet është edhe mbrojtja e kufijve të brendshëm të Europës, kryesisht kufiri midis Greqisë dhe Maqedonisë”, deklaroi Kern.
Për presidentin e Këshillit Europian, Donald Tusk, mbyllja e rrugës për refugjatët nuk është domosdoshmërisht diçka e keqe, shkruan Top Channel.
“Ne duhet të përmirësojmë efikasitetin e veprimeve tona. Kemi nevojë që të konfirmojmë politikisht se rruga e Ballkanit perëndimor është e mbyllur për një qëllim të mirë, për të shmangur emigracionin e paligjshëm dhe e përgëzoj kancelarin Kern që na mblodhi bashkë për këtë iniciativë”, deklaroi Tusk.
Ndërsa kancelarja gjermane Angela Merkel tha se kthimi në vendet e tyre të emigrantëve që nuk kanë marrë statusin e azilantit është një tjetër objektiv i rëndësishëm.
“Ne biseduam sot për domosdoshmërinë e përfundimit sa më shpejtë të marrëveshjeve me vendet e treta, sidomos me Afrikën, Pakistanin dhe Afganistanin, me qëllim qe ata të cilët nuk mund të qëndrojnë në Europë për arsye humanitare do të kthehen në vendet e tyre. Po ashtu, Gjermania i ofron mbështetje Greqisë dhe Italisë, pasi çdo muaj do të marrë qindra emigrantë nga të dyja vendet”, tha Merkel.
Në samitin e Vjenës ishte edhe delegacioni shqiptar i kryesuar nga kryeministri Edi Rama. “Shqipëria ka pozicionin e saj të qartë të shprehur që në fillim. Marrim pjesë në këtë përpjekje nëse është e përbashkët, e koordinuar dhe mirorganizuar nga të gjitha vendet. Shqipëria nuk mund të çelë kufijtë apo të veprojë si disa vende që tradhëtojnë vlerat e BE-së”, tha Rama.
