Haxhi Qamili: “Ç’më duhet mua Inglezi e Austriaku, sa të jetë me mua Ndroqi e Shijaku”
TemA
Kryeministri i Kosovës, Ramush Haradinaj, është pajisur me pasaportë të Republikës së Shqipërisë.
Përmes një postimi në llogarinë e tij në Facebook, Haradinaj ka shkruar:
“E falënderoj shtetin shqiptar dhe e kam për nder të jashtëzakonshëm, që sot u pajisa me pasaportën e Republikës së Shqipërisë”.
Ramush Haradinaj mund të merrte pasaportën e Shqipërisë në çdo kohë.
Mund ta merrte më 1999, 2000, 2004, e më pas.
Sot është një ditë e gabuar që Shqipëria të bëjë karshillëk duke i dhënë pasaportën e shtetit të saj, një kryeministri i cili po fut në izolim ndërkombëtar Kosovën, duke i bërë karshillëk SHBA edhe pse vendeve më të rëndësishme të Perëndimit.
Është karshillëk i dëmshëm, që e bën përgjegjës shtetin shqiptar.
Shqipëria sot duhet ta kishte thirrur Ramush Haradinajn për ta qortuar, dhe pse jo për ta urdhëruar në emër të kombit shqiptar, të tërhiqej nga deklaratat e tij për shfuqizim të Gjykatës Speciale dhe mos ratifikim të kufirit me Malin e Zi, gjeste të cilat jo vetëm e izolojnë Kosovën, por nisin procesin e zhbërjes së saj.
Dhe nëse e kanë bërë në takime formale këtë gjë, dhe nuk e kanë bërë publike, kanë bërë gabim.
Shqipëria e ka për detyrë t’u tregojë shqiptarëve në Kosovë, se cënimi i raporteve të Kosovës me Perëndimin, është fundi i Kosovës.
Shqipëria nuk ka as fuqi dhe as të drejtë, të jetë në anën e disa politikanëve të papërgjegjshëm të Kosovës, kundër SHBA dhe Perëndimit, pasi Kosova është i vetmi shtet në botë i krijuar nga Perëndimi dhe në emër të standarteve të lirisë së Perëndimit.
Është i vetmi shtet për të cilën Perëndimi ka bombarduar në emër të të drejtave të njeriut.
Karshillëku me pasaportën shqiptare në Tiranë na kujton Haxhi Qamilin e vitit të mbrapshtë të Shqipërisë më 1913, kur i thoshin se “Perëndimi nuk e njeh luftën tënde”, dhe ai përgjigjej: “Ç’më duhet mua Inglezi e Austriaku, sa të jetë me mua Ndroqi e Shijaku”
