Grupi Parlamentar i Aleancës për Ardhmërinë e Kosovës, ka marrë vendimin që, siç thotë, ‘a bojkotojë Kuvendin e Kosovës’ deri më 6 prill, kur pritet të merret vendimi për udhëheqësin e saj Ramush Haradinaj, nga gjykata franceze në Colmar.
Në një kumtesë të tij, Grupi Parlamentar i AAK-së thotë se duke qenë “i bindur se nuk po ndërhyn në sistemin e drejtësisë, shtyrjen e vendimit për lirimin e Ramush Haradinajt, e konsideron padrejtësi në vete”. Grupi Parlamentar i AAK-së në kumtesën e tij thotë se “të pakënaqur me angazhimin e institucioneve të Republikës së Kosovës, Presidentit, Qeverisë por edhe Kuvendit në përshpejtimin e lirimit të Ramush Haradinajt, Grupi Parlamentar i AAK-së merr vendim ta bojkotojë Kuvendin e Kosovës, deri me datë 6 Prill 2017”.
“Deputetët e AAK-së, janë të zhgënjyer me neglizhencën që institucionet e Kosovës e kanë pasur në Rastin Haradinaj, por edhe në raport me fletarrestet e kundërligjshme të Serbisë ndaj shtetasve të Kosovës. Ne deputetët e AAK-së, kemi vendosur për këtë masë, me bindjen se kjo do të kuptohet drejt dhe do të nxisë angazhimin e duhur të shtetit të Kosovës në mbrojtjen e ish-kryeministrit të vendit, Ramush Haradinaj”, thuhet në kumtesën e Grupit Parlamentar të AAK-së. Një gjykatë në Francë ka shtyrë vendimin për kryetarin e AAK-së, Ramush Haradinaj, deri më 6 prill si “një afat shtesë përt’i shqyrtuar argumentet shtesë të deponuara nga Prokuroria Speciale e Serbisë”
