“Demarkimi është ose po ose jo, ne nuk mund të ju ndihmojmë. Demarkimi duhet të plotësohet. Nuk dua të angazhohem në lojën e fajtorëve kush çka ka bërë. Ky kusht është pranuar nga ju, pyetni njerëzit tuaj pra pse e kanë pranuar atëherë këtë kusht”, tha Apostolova
Shefja e Zyrës së BE-së në Kosovë Natalia Apostolova tha sot se demarkacioni është politizuar.
Pas takimit me shefin e grupit parlamentar të PDK-së dhe anëtarët e komisioneve të Kuvendit nga kjo parti, shefja e Zyrës së BE-së Natalya Apostolova kriteret për liberalizim të vizave i vlerësoi jopolitike.
“Kriteret për liberalizim nuk janë kurrë politike, ngase nuk bëhen nga politikat e jashtme të BE-së, por nga shërbimet teknike- Drejtoria për Fqinjësi të Mirë”, tha Apostolova.
Për të lëvizur pa viza qytetarët e Kosovës, institucionet duhet ta ratifikojnë marrëveshjen për demarkacion me Malin e Zi dhe të kenë rezultate në luftën kundër korrupsionit dhe krimit të organizuar.
Apostolova më tutje deklaroi se askush nuk e ka pritur që Kosova të ketë kaq shumë problem me ratifikimin e marrëveshjes së demarkacionit me Malin e Zi të nënshkruar në Vjenë në vitin 2015.
“Mali i Zi e ka ratifikuar aq shpejt dhe askush nuk e ka pritur që ju do të keni kaq shumë problem. Kjo çështje është politizuar dhe është pikëlluese si është politizuar”, tha Apostolova.
Kryeministri i Kosovës Ramush Haradinaj në vendimin e tij të parë kur erdhi në këtë detyrë e shkarkoi Komisionin për Shenjimin e Kufirit me Malin e Zi, ndërsa vazhdon të thotë se kufiri mes dy shteteve është në Çakorr dhe Kullë, që nuk janë pjesë e Kosovës në vijën ndarëse të përcaktuar me marrëveshje.
Kryeministri Edi Rama tha kur u takua në Tiranë me Haradinajn se po shpreson që Haradinajt i duhet edhe pak kohë të ndryshojë qëndrimin opozitar për demarkacionin.
Apostolova, pas takimit me zyrtarë të PDK-së, tha se çështja e demarkacionit duhet kryer.
“Demarkimi është ose po ose jo, ne nuk mund të ju ndihmojmë. Demarkimi duhet të plotësohet. Nuk dua të angazhohem në lojën e fajtorëve kush çka ka bërë. Ky kusht është pranuar nga ju, pyetni njerëzit tuaj pra pse e kanë pranuar atëherë këtë kusht”, tha Apostolova
