Një ndër personat më të kërkuar në rastin “Medikus II”, Moshe Harel është arrestuar ditë më parë në Qipro.
Ai ka qenë i kërkuar që një kohë të gjatë nga autoritet e Kosovës, madje ishte në listën e Interpolit.
Mjeku 68 vjeçar, Moshe3 Harel, që ka lindur në Turqi, por me kombësi Izraelite, dyshohet për trafikim të organeve në Kosovë, ndërsa që ka më shumë se 7 vite që është në kërkim nga autoritetet e sigurisë.
Ndryshe, aktakuza për këtë rast ishte ngritur me 10 Qershor 2011, nga prokurori i EULEX-it, Jonathan Ratel, i cili kirurgun turk, Yusuf Ercin Sonmez, e ngarkonte me akuza për trafikimin me njerëz, krimin e organizuar dhe ushtrim të paligjshëm të veprimtarisë mjekësore, ndërsa izraelitin Moshe Harel për trafikim të njerëzve dhe krim të organizuar. Rastin e arrestimit e ka konfirmuar edhe Policia e Kosovës,përmes zëdhënësit të saj Bakim Kelani, raporton Dukagjini.
“Policia e Kosovës posedon informacione se në bazë të një urdhërarresti ndërkombëtar, ditë më parë në Qipro është arrestuar personi i dyshuar (M.H.), i cili ka qenë në kërkim nga viti 2010”, ka thënë Kelani.
Ai ka bërë të ditur se lidhur me ekstradimin e tij do të merren autoritetet të tjera kompetente, mirëpo ende nuk dihet nëse i njëjti do të ekstradohet në Kosovë apo Rusi, pasi që po ashtu është në kërkim edhe nga ky shtet.
