European Observatory of Crime and security ka publikuar një shkrim lidhur me bandat shqiptare të krimit për të cilat shpreh shqetësim për bandat shqiptare të krimit. Ora News përshtati artikullin që mban titullin “Raportet nënvizojnë rritjen e bandeve shqiptare të krimit”.
Sipas raportimeve të shumta ndërkombëtare organizatat kriminale shqiptare janë shumë aktive në trafikun e drogës. Përveç prodhimit lokal, tani ka rrugë të rëndësishme edhe nga Amerika e Jugu.
Organizatat kriminale shqiptare “kontrollojnë territoret, prodhojnë investime të konsiderueshme dhe ndikojnë në mënyrë aktive në politikën shqiptare“, – thuhet në raportin e fundit i Shoqërisë së Hapur mbi evolucionin e krimit të organizuar në Shqipëri (2017).
“Shqipëria prodhon dhe eksporton sasi të konsiderueshme marijuane, sidomos në Europë, dhe është vend tranzit për heroinën afgane dhe kokainën, duke shërbyer si hyrja kryesore për shpërndarjen e heroinës në Evropë” shkruan Departamenti Amerikan i shtetit në raportin për strategjinë e kontrollit ndërkombëtar të drogërave, të publikuar në mars 2018 duke nënvizuar se edhe nëse numri i konfiskimeve dhe arrestimeve të drogës është rritur në vend gjatë viteve të fundit, mbeten dyshime rreth angazhimit të qëndrueshëm të qeverisë për aplikimin e ligjit me vendosmëri.
Shqipëria është e regjistruar në hartën globale të drogës si një vend prodhues dhe një nyje shpërndarjeje. Ky vlerësim u konfirmua edhe në Raportin Botëror të Drogës 2017 nga Kombet e Bashkuara, i cili thekson ekzistencën e “dëshmive konkrete” të përfshirjes së grupeve kriminale shqiptare në të gjithë trafiqet më të mëdha të drogës në Evropë (heroinë, kokainë, kanabis).
Në shkurt 2018, psh, një sasi rekord prej 613 kg kokainë e pastër u sekuestrua në portin e Durrësit, pasi mbërriti e fshehur në një kontejner me banane direkt nga Kolumbia.
Vlera e saj, e vlerësuar nga policia shqiptare në 180 milionë euro, tregon se një rrugë e re është vendosur midis Amerikës Jugore dhe brigjeve shqiptare. Një fakt i konfirmuar edhe nga Agjencia Kombëtare Britanike për Krime (NCA), e cila vëren se “kriminelët në Ballkan po rrisin gjithnjë e më shumë rrjetin e tyre të ndikimeve, duke formuar marrëdhënie të drejtpërdrejta me furnizuesit e kokainës në Amerikën Latine”.
Për NCA, “kërcënimi i grupeve kriminale shqiptare është i rëndësishëm. Londra është qendra e tyre kryesore, por ata janë vendosur në të gjithë Mbretërinë e Bashkuar.”
Ky zgjerim ndërkombëtar në mënyrë të pashmangshme prodhon pasoja brenda kufijve të Shqipërisë. “Shqipëria shërben si bazë për operacionet e organizatave rajonale kriminale. Paratë e paligjshme mund të riciklohen lehtësisht,” – vëren Departamenti Amerikan i Shtetit.
Por si është rikthyer paraja e drogës në Shqipëri?
Raporti i Shoqërisë së Hapur citon mbi të gjitha sektorin e pasurive të paluajtshme, kazinotë dhe qendrat e basteve, ashtu si dhe raporti i Departamentit të Shtetit, i cili thotë se “agjencitë e zbatimit të ligjit e njohin nevojën për të luftuar pastrimin e parave, por mbeten shumë të paaftë për ta bërë këtë.”
Këshilli Europian, vendosi të shtyjë fillimin e bisedimeve me një vit. Duke përshëndetur “përpjekjet” shqiptare, vëren se “shkatërrimi i grupeve kriminale mbetet një sfidë e rëndësishme“.
“Këshilli thekson rëndësinë që Shqipëria të japë rezultate të prekshme dhe të qëndrueshme, madje edhe në fusha specifike si shtypjen e kultivimit dhe trafikimit të drogës“, thuhet në deklaratën përfundimtare të takimit të 27-28 qershorit.
Njëzet e tetë liderët evropianë ftojnë Tiranën të “vazhdojë dhe thellojë përpjekjet e tyre për të reduktuar kultivimin e kanabisit” dhe “të sigurojë arritjen e rezultateve konkrete në luftën kundër korrupsionit dhe çmontimin e rrjeteve të krimit të organizuar“.
Për këto çështje po ashtu edhe në të tjera, qeveria shqiptare do të duhet të punojë deri në 2019 për të bindur Bashkimin Europian që të hapë negociatat e pranimit. Deri në atë datë, “lufta pa mëshirë ndaj drogës” e premtuar në vitin 2013 nga kryeministri Edi Rama do të duhet të sjellë rezultate konkrete.
