Të tjera detaje janë zbardhur në lidhe me “shtëpinë e barit” që është zbuluar në zonën e Peqinit, në banesën e drejtorit të burgut të Rrogozhinës Bilal Hasa, i cili është shpallur në kërkim dhe është pezulluar nga detyra.
Policia bën me dije se u zbuluan në bodrumin e një magazine dy ambiente të përshtatura posaçërisht për kultivimin e bimëve narkotike në ambiente të mbyllura me anë të llambave.
Në këto ambiente ishin kultivuar rreth 4000 bimë kanabis, ndërsa u sekuestruan gjithashtu llamba, neonë dhe pajisje të tjera elektrike që shërbenin për rritjen e bimëve.
Nga hetimet paraprake rezultoi se ambienti është në pronësi të Bilal Hasës, i cili është shpallur në kërkim nga policia bashkë me Ervis Maçin, me detyrë përgjegjës i OSHEE-së për zonën e Peqinit.
Njoftimi i policisë:
Peqin/Finalizohet operacioni policor i koduar “Kurtaj” për goditjen e kultivimit të bimëve narkotike në ambiente të mbyllura me anë të llambave.
Operacioni u zhvillua nga Drejtoria për Krimet në Volum në Drejtorinë e Përgjithshme të Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.
Zbulohen 2 ambiente të përshtatura për kultivimin e bimëve narkotike.
Sekuestrohen rreth 4000 bimë kanabisi, llamba, neonë dhe pajisje të tjera elektrike.
Shpallet në kërkim pronari i ambientit.
Në kërkim edhe përgjegjësi i OSHEE-së për Peqinin, për shpërdorim detyre.
Në vijim të planit të masave për evidentimin dhe goditjen e kultivimit të bimëve narkotike në ambiente të mbyllura, bazuar edhe në informacionet e siguruara në rrugë operative, shërbimet e Policisë në kuadër të operacionit policor të koduar “Kurtaj”, ushtruan kontroll në fshatin Kurtaj, njësia administrative Gjocaj.
Gjatë kontrollit, në bodrumin e një magazine, u konstatuan 2 ambiente të përshtatura për kultivimin e bimëve narkotike me anë të llambave, ku ishin kultivuar rreth 4000 bimë kanabis.
Nga veprimet hetimore rezultoi se ambienti është në pronësi të shtetasit B. H., i cili u shpall në kërkim.
Në vijim të veprimeve, për veprën penale “Shpërdorimi i detyrës”, u shpall në kërkim edhe shtetasi E. M., me detyrë përgjegjës i OSHEE-së për zonën e Peqinit.
Shërbimet e Policisë vijojnë punën për kapjen e tyre.
