Dy përleshje fizike kanë ndodhur sot gjatë hapjes së ofertave të tenderimit në Agjencinë Kosovare të Privatizimit, në të cilat janë përfshirë së paku katër persona.
Policia e Kosovës i ka konfirmuar Insajderit për incidentet dhe ka dhënë detaje lidhur me rastet.
Flora Ahmeti, zëdhënëse në polici, ka thënë se incidenti i parë ka ndodhur rreth orës 10:30 mes dy personave, meqë rast njëri nga ta ka pësuar lëndime trupore, kurse i dyshuari tjetër është arrestuar.
Ndërsa në rastin e dytë, që ka ndodhur një orë më vonë, një person është lënduar si pasojë e përleshjes porse nuk ka pasur të arrestuar.
AKP ka zhvilluar sot procesin e hapjes së ofertave për shitjen e 29 aseteve të ndërmarrjeve në likuidim.
Në këtë valë të Privatizimit janë 51 njësi nga e gjithë Kosova, për të cilat janë pranuar 150 oferta.
Ylli Kaloshi, zëdhënës në AKP, ka konfirmuar incidentin e ndodhur, por nuk ka dhënë detaje të tjera lidhur me rastin, duke kërkuar që të dhëna të tjera rreth rastit t’i kërkohen vetëm Policisë së Kosovës. /Insajderi.com
