Një 37 vjeçar është arrestuar ditën e sotme në Malësi të Madhe pasi kundërshtoi me forcë punonjësin e policisë që e gjobiti për parkim të gabuar.
Në pranga ka rënë shtetasi Vinçens Sterkaj, 37 vjeç, banues në fshatin Dedaj.
Oficeri i Policisë së Rendit konstatoi automjetin e Sterkajt, i cili ishte parkuar në vend të gabuar duke penguar qarkullimin e makinave të tjera, ndaj dhe i dha një masë administrative për shkeljen rrugore të kryer.
37 vjeçari e ka kundërshtuar me forcë policin, e më pas është larguar.
Ai u arrestua në banesën e tij.
Sterkaj akuzohet për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të policisë”.
Çështja i ka kaluar Prokurorisë së Shkodrës për veprime të mëtejshme.
Njoftimi i policisë:
Malësi e Madhe
Kundërshtoi me forcë punonjësin e Policisë që i vuri masë administrative për parkim të gabuar dhe u largua, kapet dhe vihet në pranga 37-vjeçari, Vinçens Sterkaj.
Specialistët e Sektorit për Krimet e Rënda të DVP Shkodër, në bashkëpunim me shërbimet e Forcës së Posaçme “Shqiponja” dhe të Komisariatit të Malësi e Madhe, arrestuan shtetasin V. S., 37 vjeç, banues në fshatin Dedaj.
Në qytetin e Koplikut, punonjësi i Policisë së Rendit ka konstatuar një automjet të parkuar në një vend që nuk lejohej, i cili pengonte qarkullimin e automjeteve të tjera. Gjatë ushtrimit të detyrës për venien e masës administrative sipas Kodit Rrugor, drejtuesi i automjetit, shtetasi V. S. ka kundërshtuar me forcë punonjësin e Policisë dhe është larguar. Pas kontrolleve nga Policia, shtetasi V. S. është kapur në banesën e tij.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të Policisë”.
