Gjigandi rus i gazit Gazprom njoftoi sot se ka ndërprerë furnizimin me gaz për Letoninë fqinje, duke e akuzuar atë për shkelje të kushteve për marrjen e gazit.
Rusia tashmë ka ndërprerë furnizimin me gaz për Poloninë, Bullgarinë, Finlandën, Holandën dhe Danimarkën, të cilat refuzuan të paguajnë për gazin në mënyrën e përcaktuar me një dekret të Presidentit Vladimir Putin, i cili parashikon hapjen e llogarive në rubla në një bankë ruse, sipas një sistemi të ri të shlyerjes tregtare.
Rusia gjithashtu ka ndaluar shitjet e gazit për Shell Energy Europe në Gjermani.
Në njoftimin e sotëm, Gazprom nuk specifikoi se cilat kushte beson se Letonia ka shkelur. Dje, kompania letoneze e energjisë Latvijas Gaze tha se po blinte gaz nga Rusia dhe po paguante në euro në vend të rublave, siç kërkohet në marrëdhëniet e saj me Gazprom./GSH
