Brenda një harku kohor prej 10 ditësh është shënuar incidenti i katërt me autobusët e linjave të transportit urban. Ditën e sotme, radhën e kishte autobusi i linjës “Qytet Studenti-Jordan Misja”, i cili ka pësuar defekt dhe ka mbetur në mes të rrugës.
Autobusi po dilte nga rruga “Jordan Misja” për të shkuar tek ish- stacioni i Trenit, por aty është fikur dhe nuk ka lëvizur nga vendi, duke shkaktuar kaos në trafikun e automjeteve, aq sa edhe polici i Rrugores i pranishëm në zonë, nuk mundi të menaxhonte situatën.
Ky është i katërti autobus brenda pak kohësh që haset në aksidente apo probleme teknike. Kujtojmë se, aksidenti i parë dhe më i rëndi ndodhi më 29 prill, ku një autobus i linjës së “Unazës së Re” në Tiranë u përplas me një makinë, dhe përfunduan në mes të lumit të Lanës. Aksidenti i frikshëm ndodhi në orën 20:10 te kinema Agimi. Pesë persona mbetën të plagosur, por fatmirësisht nuk morën dëmtime serioze.
Më 2 maj, vetëm 3 ditë më pas një urban i linjës “Qytet Studenti – Jordan Misja” u përplas me stacionin në afërsi të maternitetit “Mbretëresha Geraldinë” te ish-stacioni i Trenit.
Ndërkohë, në 4 maj, autobusi i linjës “Kristal-Qendër” u përplas me një karrotrec po te stacioni i Trenit. Fatmirësisht nuk pati të lënduar./GSH
