Kandidati për kryeministër të vendit nga koalicioni LDK-AKR-Alternativa, Avdullah Hoti, ka falënderuar sot të gjithë pjesëmarrësit në zgjedhjet e 11 qershorit.
Hoti përmes Facebook-ut ka thënë se LDK me partnerët ka zhvilluar një fushatë fer dhe të civilizuar, që sipas tij shfaq një standard të ri në politikën e vendit.
Hoti ka theksuar se LDK do të punojë rreth perspektivës evropiane të Kosovës, duke u zotuar se “nuk do të lëshojnë rrugë për ata që dhunojnë këto vlera”.
Postimi i Hotit në Facebook:
“Të nderuar anëtarë dhe simpatizantë të LDK-së, Të nderuara struktura të LDK-së të nëndegëve dhe degëve, Forumit Rinor, Forumit të Grave, Kuvendit të LDK-së, Këshillit të Përgjithshëm dhe Kryesisë së LDK-së, Të nderuar qytetarë, votues të LDK-së dhe koalicionit,
Dëshiroj t’ju falënderoj nga zemra për mbështetjen që më keni dhënë në këto zgjedhje. Këto tri javë për mua kanë qenë një rrugëtim i jashtëzakonshëm. Kam takuar mijëra qytetarë të të gjitha moshave, studentë, të rinj e të reja, afaristë, bujq, pensionistë, punëtorë.
Me ekipin tim, jam mundur të zhvilloj një fushatë të civilizuar, fer, me program të qartë dhe të realizueshëm. Besoj shumë se kemi vendosur një standard të ri në politikë në këtë drejtim.
Dëshiroj në emrin tuaj të falënderoj të gjithë ata që kanë qenë të përfshirë në procesin zgjedhor, komisionarët, vëzhguesit vendor dhe ndërkombëtar, KQZ, KKZ, policinë dhe organet e rendit, për punën e tyre në mbrojtje të votës së sovranit.
Pres nga KQZ që në ditët në vijim të certifikojë rezultatin e zgjedhjeve dhe të themelohen institucionet e vendit në përputhje me Kushtetutën.
Rrugëtimi jonë bashkë do të vazhdojë për të mbrojtur liritë tona qytetare, rendin dhe ligjin dhe siguruar perspektivën evropiane për Kosovën. Rrugë tjetër nuk ka. LDK dhe unë nuk do të lëshojmë rrugë për ata që dhunojnë këto vlera. LDK dhe unë do të qëndrojmë të palëkundur në mbrojtje të këtyre vlerave” (sic). /Telegrafi/
