Gazetar: Avni Tahiri
Kjo ishte atmosfera sot me regjimin e posaçëm të komunikacionit në zonën qendrore të qytetit të Shkupit, shkruan Alsat.
Një pjesë e qytetarëve thonë se nuk janë informuar në kohë dhe kjo ka shkaktuar rrëmujë në komunikacion, ndërsa disa të tjerë propozojnë zhvendosjen e disa institucioneve publike larg qendrës së Shkupit.
“Mendoj se nuk është në rregull që të ketë kësi rrëmujë sepse tani duhet të arrija tek spitali shtetëror dhe nuk kam nga të hyjë, nga të gjithë anët është e zënë, nuk është në rregull në këto temperatura, duhet në kohë të na informojnë nëse planifikojnë diçka që të mos lëvizim në atë kohë të ditës apo të mos shfrytëzojmë veturat”, tha një qytetare.
“Nuk është mirë, nuk është e këndshme për këmbësoret dhe qytetaret tjerë. Po ka nervozë sigurisht dhe duke parë edhe temperaturat e larta e shton presionin dhe nervozë. “Apo dislokim të institucioneve publike të cilët mund të jenë më larg ku do të dihet se lëvizin veturat e diplomatëve dhe veturat me përcjellje”, u shpreh një qytetar.
“Kjo është pafytyrësi, një orë pres këtu që të kaloj vizë bardhat, e turpshme”, tha një qytetar.
“…duhet të ketë rregulla më të mira nga kjo që është, a është tek populli apo tek MPB-ja nuk e di por duhet të ketë organizim më të mirë, por njëjtë është kur vinë delegatë të huaj edhe jashtë edhe këtu, mund të durojmë dy-tre ditë, nëse është për të mirën e Maqedonisë duhet të durojmë gjithçka”, u shpreh një qytetare.
Përveç ditës së sotme regjimi në komunikacion do të vazhdoj edhe gjatë ditës së nesërme, njoftojnë nga Ministria e Punëve të Brendshme.
Regjimi i qarkullimit, siç thotë MPB, po vendoset për shkak të mbajtjes së takimit ministror në kuadër të Procesit të Bashkëpunimit të Evropës Juglindore dhe takimit të Kryetarëve të Shteteve dhe Qeverive në kuadër të Procesit.
Nga sektori për Punë të Brendshme apelojnë deri te të gjithë qytetarët, shfrytëzuesit e rrugës, që të respektojnë urdhrat e zyrtarëve policorë./ Alsat.mk
