Atletja Luiza Gega ka arritur distancën prej 42 km në një kohë prej 2 orë dhe 34 minuta.
Një rekord ky kombëtar për Maratonën e Tiranës, e cila po zhvillon edicionin e saj të tetë këtu në kryeqytet, Gega shprehu emocionet e saj pas përfundimit të garës, duke theksuar se ishte një sfidë e dyfishtë për të, pasi gjatë dy ditëve të fundit kishte kaluar një grip të fortë.
“Kam nisur me frikë, sepse nuk e dija se sa do të arrija të mbaja,” tha Gega. “Kur vijnë kilometrat e fundit, trupi pëson një shok. Të vraposh në Tiranë është një kënaqësi më vete. Njerëzit që të urojnë rrugës dhe bëjnë tifo për ty, të japin një forcë që ti nuk mendon se e ke.”
Gega, e cila ka marrë pjesë në këtë maratonë për të tetin vit, theksoi rëndësinë e komunitetit që e mbështet atë në aventurat e saj sportive.
“Kam njerëz që më mbështesin në atë që bëj. Kjo maratonë është ndryshe nga çdo garë që bëj,” tha ajo.
