Anglia dhe Franca vendosin të arrijnë marrëveshje për të ndaluar migrantët të kalojnë Kanalin javën e ardhshme, thonë mediat britanike
Mbretëria e Bashkuar dhe Franca janë në prag të arritjes së një marrëveshjeje për të trajtuar imigracionin përgjatë Kanalit Anglez, një marrëveshje që mund të vijë që të hënën, raportuan gazetat britanike të dielën.
Londra dëshiron të sigurojë ndihmën e Francës për të ndaluar emigrantët të bëjnë kalimin e rrezikshëm përmes rrugës ujore. Kritikët kanë thënë se Mbretëria e Bashkuar duhet të krijojë më shumë rrugë ligjore për njerëzit që të hyjnë në vend.
Pothuajse 40,000 njerëz kanë kaluar Kanalin me varka të vogla deri më tani në vitin 2022, zbulon një hulumtim nga BBC.
Në vitin 2020, kjo shifër ishte 8,404. Më shumë se gjysma e këtyre njerëzve janë nga Shqipëria (18%), Afganistani (18%) dhe Irani (15%).
Telegraph, një gazetë e përditshme britanike, tha se Franca do të pajtohet për një qendër të përbashkët kontrolli ku do të vendosen zyrtarët britanikë të imigracionit.
Të premten, Ministri i Jashtëm britanik James Cleverly dhe homologja e tij franceze Catherine Colonna lëshuan një deklaratë duke theksuar “nevojën urgjente të trajtimit të të gjitha formave të migrimit të paligjshëm”.
Zyrtarët britanikë kanë thënë më parë se një marrëveshje ishte afër.
Numri rekord i emigrantëve që tentojnë të hyjnë ilegalisht në Mbretërinë e Bashkuar ka ushtruar presion mbi kryeministrin e ri britanik për të gjetur një zgjidhje efektive.
Javët e fundit, zyrtarët e Mbretërisë së Bashkuar janë vënë nën kritika për mbipopullimin dhe kushtet e këqija në qendrat e përpunimit të azilit, me një qëndër në Manston që u sulmua me zjarr nga një ekstremist në fund të tetorit.
Qeveria po përballet gjithashtu me mungesën e akomodimit emergjent, një sistem të bllokuar azili dhe shpenzime në rritje për taksapaguesit.
Një tjetër gazetë britanike, Express, tha se një marrëveshje midis Parisit dhe Londrës mund të nënshkruhet javën e ardhshme.
Ka të ngjarë që në të përfshihen më shumë dronë britanikë për të zbuluar emigrantët që fshihen në dunat e rërës përpara se të tentojnë kalimet e rrezikshme shpesh në gomonet e pasigurta.
Në nëntor 2021, një gomone e fryrë që transportonte emigrantë nga Franca në Mbretërinë e Bashkuar u përmbys në Kanal, duke shkaktuar vdekjen e 27 vetëve nga 30 personat në bord.
Marrëdhëniet midis Britanisë dhe Francës janë përmirësuar që kur Rishi Sunak mori detyrën muajin e kaluar.
Gjërat ishin acaruar këtë vit pasi Liz Truss ngriti pyetjen nëse Presidenti francez Emmanuel Macron ishte mik apo kundërshtar gjatë fushatës së saj për t’u bërë kryeministre.
