Ministria e Punëve të Brendshme u ka bërë thirrje qytetarëve që të zëvendësojnë targat në RKS (Republika e Kosovës).
“Nga data 1 gusht 2022 deri më 30 shtator 2022, do të fillojë organizimi i procesit për regjistrimin e targave ilegale në ato RKS, në të gjitha Qendrat për Regjistrimin e Automjeteve”, thuhet në njoftimin e 23 korrikut në faqen zyrtare të Ministrisë së Punëve të Brendshme.
Sipas MPB-së, brenda këtij afati, qytetarët “do të kenë mundësinë që të jenë përfitues të shumë lehtësirave për kthimin e mjeteve të tyre në targa RKS”.
Sipas njoftimit, qytetarët që zëvendësojnë target do të lirohen nga: taksat doganore, taksa administrative në Qendrën e Regjistrimit të Automjeteve, tarifa për targën dhe tarifa për për pajisje me certifikatë për regjistrimin e mjetit.
“Është një mundësi shumë e mirë, që do të ndihmojë në vendosjen e ligjshmërisë dhe sundimin e ligjit, gjë që qytetarët e shtetit tonë e dëshirojnë pa dallim”, thuhet në njoftim.
Heqja e këtyre tabelave ishte rishikuar në Marrëveshjen për lirinë e lëvizjes, të cilën Kosova dhe Serbia e arritën në vitin 2011, por ajo nuk u zbatua asnjëherë në veri të Kosovës. Prishtina zyrtare deri vitin e kaluar ka toleruar përdorimin e targave KM, edhe pse i konsideronte të paligjshme.
Në veri të Kosovës janë rreth 10,000 mjete me targa KM, të cilat janë lëshuar nga Zyra serbe e Policisë për Mitrovicën, me seli në Rashkë, qytet në Serbi.
