Është ndarë sot nga jeta në moshën 75-vjecare Profesori i njohur i Veterinarisë, Kristaq Bërxholi.
Ai është lindur me 1 gusht 1948 në Lunxhëri të Gjirokastrës. Me mbarimin e shkollës së mesme në qytetin e Gjirokastrës, Bërxholi ndoqi studimet e larta për Mjekësinë Veterinare në Institutin e Lartë Bujqësor.
Pas përfundimit të studimeve në vitin 1973, punoi si veteriner dhe më pas si përgjegjës i shërbimit veterinar në Tepelene. Në vitin 1979 emërohet kërkues në Departamentin e Virologjisë në Institutin e Studimeve Veterinare në Tiranë, Institut që me vonë e drejtoi, në vitet 1997 deri 2002.
Nga viti 2002 punoi si pedagog në Fakultetin e Mjekësisë Veterinare dhe nga viti 2004 ishte drejtues i Departamentit të Lendeve Paraklinike të këtij fakulteti.
Pas kualifikimit universitar ai u pajis me disa grada dhe tituj shkencorë si “Doktor Shkencash“, dhe “Profesor”. Profesor Bërxholi është autor i shumë botimeve shkencore për sëmundjet virologjike, imunologjike dhe zoonozat.
Ai ka qene një bashkëpunëtor i ngushtë i medias për çështjet e sigurisë ushqimore dhe shëndetit publik.
