Efektivi Erion Goxhara, i cili plagosi me armën e shërbimit 45 vjeçarin, Lorenc Kosta për motive xhelozie, u vetëdorëzua pranë autoritete tre ditë pasi ishte shpallur në kërkim.
Është bërë e mundur zbardhja e dëshmisë së tij, i cili ka shprehur se nuk ka dashur të vrasë Lorenc Kosta, por e ka parë atë rastësisht në rrugë, në zonën e “Komunës së Parisit”.
Punonjësi i policisë ka thënë se ishte me vajzën e tij në një lokal të kësaj zone dhe pasi ka larguar vajzën, është rikthyer sërish në “Komunën e Parisit”.
Në këtë moment ai ka qëlluar 45 vjeçarin me armën e shërbimit që e kishte me vete, por nuk ndodhej në orar pune.
Ai deklaron se nuk e ka bërë me paramendim plagosjen e 45 vjeçarit, duke nënkuptuar se ka qenë veprim nga gjaknxehtësia e momentit.
“Nuk kam dashur ta vras Lorenc Kostën dhe e kam parë rastësisht në zonën e “Komunës së Parisit” pasi kam qenë me vajzën time në një lokal në atë zonë. Pasi kam larguar vajzën jam kthyer sërish te “Komuna e Parisit” dhe e kam qëlluar Kostën me armën e shërbimit të cilën e kisha me vete. Deklaroj se nuk e kam bërë me paramendim plagosjen e Kostës”, ka thënë Erion Goxhara përpara uniformave blu.
Po kështu burimet raportojnë se Goxhara ka dëshmuar përpara bluve se Kosta e provokonte sa herë ndesheshin përballë njëri tjetrit, duke e kërcënuar për heqje nga puna e tij si efektiv.
“Kosta më provokonte sa herë përballesha dhe më thonte ‘do të heq nga puna’”, ka thënë ai.
Erion Goxhara sqaron se pas ngjarjes ka takuar djalin e tij dhe ka shkuar në zonën e Freskut, por kur ka parë policinë është larguar menjëherë duke u arratisur drejt Dajtit. Ky veprim kujtojmë se është konfirmuar dhe nga djali i tij, i cili ka dëshmuar të njëjtën gjë përpara bluve.
“E qëllova te këmbët sepse nuk doja ta vrisja. Pas krimit u largova takova djalin, shkova drejt zonës së Freskut dhe kur pashë policinë u largova drejt Dajtit”, ka deklaruar Goxhara.
HETIMET PER NGJARJEN
Ngjarja e rëndë ndodhi mesditën e 19 gushtit në një zonë të populluar të Tiranës. Para se të plagoste Lorenc Kostën, efektivi kishte zhvilluar një takim me bashkëshorten dhe nipin e tij, L.B. në një qendër tregtare.
Gjatë këtij takimi, në dosje thuhet se gruaja ka pranuar tradhtinë, por nuk ka pranuar që t’i kërkojë ndjesë efektivit Goxhara. Sipas saj, tradhtia ka ndodhur vetëm një herë. Të njëjtën ditë, Goxhara pasi përfundon këtë bisedë, zhvendoset pranë lagjes ku jetonte dhe ka plagosur Lorenc Kostën, i cili po ashtu jetonte në atë zonë. Pasi e la të mbuluar me gjak, e filmoi atë çfarë bëri dhe videon ia dërgon të plagosurit në telefon: “Mëso të mos futesh më në shtëpitë e të tjerëve dhe të hash djersën e tyre”.
I plagosuri, aktualisht është jashtë rrezikut për jetën. Në deklarimet e dhëna para oficerëve të Policisë Gjyqësore në prezencë të psikologut, djali efektivit ka konfirmuar konfliktet mes prindërve të tij që nga mesi i korrikut, kohë kur sipas tij, e ëma pranon dyshimet e Goxharës për lidhjen jashtëmartesore me Kostën. Ndaj Erjon Goxharës rëndon akuza e vrasjes me paramendim të mbetur në tentativë. Ai pritet të dalë ditën e sotme para Gjykatës së Tiranës, ku edhe do të njihet me masën e sigurimit personal.
DOREZIMI
Pas më shumë se 48 orësh në arrati, efektivi i policisë, Erjon Goxhara, i cili plagosi me 6 plumba inxhinierin e ERE, Lorenc Kostën te zona e ‘Komunës së Parisit’ në kryeqytet, është vetëdorëzuar në polici.
Efektivi, tashmë i shkarkuar nga detyra, kishte edhe armën e shërbimit me të cilën kreu veprën penale. 46- vjeçari qëlloi në pjesën e poshtme të trupit inxhinierin e ERE, pasi ky i fundit kishte lidhje me gruan e efektivit.
“Në vijim të informacionit të dhënë më datë 19.08.2024, për ngjarjen e ndodhur në afërsi të një marketi në rrugën ‘Tish Daija’, sot rreth orës 17:00 është vetëdorëzuar në Drejtorinë Vendore të Policisë Tiranë, së bashku me armën e shërbimit me të cilën ka kryer veprën penale, shtetasi Erjon Goxhara, 46 vjeç. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme”, – njofton polica.
Djali i policit i tregoi policisë se e kishte takuar të atin dhe se në bisedën që kishte pasur me të ai, ka qenë shumë i tronditur. Po ashtu kanë qenë të shumtë miqtë dhe kolegët që e kanë telefonuar që ai të dorëzohej, ndonëse djalit iu kishte betuar se nuk do ta bënte një akt të tillë. Efektivi tani do të jetë nën tri akuza të rënda.
