Mjeshtri i madh, Zhani Ciko, foli sot në emisionin “Kjo Javë” në News 24 me moderatore Nisida Tufën, lidhur me fenomenin e ditëve, këngëtaren Parshqevi Simakun.
Zhani Ciko tha se Parshqevia në rininë e saj ka qenë një artiste me ambicie dhe shumë e talentuar.
Ai zbuloi se në vitet ’90 Parashqevia i kishte kërkuar ndihmë që t’i siguronte vizë për në Itali, e nga atje më pas ajo do të gjente mjetet dhe rrethanat për të shkuar në SHBA.
Mjeshtri tha se Simaku kishte ëndërr të shkonte në SHBA, dhe se kishte dëshirë të madhe që të konfirmonte talentin e saj jashtë Shqipërisë.
Kujtojmë se Parshqevi Simaku u bë kryefjala e ditëve të fundit, për shkak të videos ku ajo u shfaq e pastrehë në rrugët e Nju Jorkut.
Zhani Ciko: Ambicia ka qenë gjithmonë te Simaku. Simaku ishte një vajzë që kërkonte të kishte mbështetje. Konkurrencën më të madhe e kishte me këngëtaret që ishin në atë kohë. Edhe me motrat Libohova kishte konkurrencë, ishin freski një natyrë tjetër, te dyja bashkë krijonin ansambël të veçantë, edhe Liljana Kondakçiu.
Çfarë e dallonte Simakun nga koleget e saj?
Zhani Ciko: Simaku nuk mori pjesë ne festivalin tim të parë që bëra në vitet 1990. Ajo kishte mendjen te mundësitë që të largohej. Unë këmbëngula, më vonë erdhi momenti dhe tregoi se duhej të largohej. Ma tha mua dhe madje më kërkoi ndihmë. Më tha unë dua të shkoj, siç duket ishin edhe arsyet ekonomike, ajo ishte shumë e lidhur me familjen. Mbase mund të ketë patur një peng të saj..
Jeta intime e artistëve është një jetë që i takon atyre. Kohët atëherë ishin të vështira, sidomos brenda institucioneve artistike, midis tyre përgojoheshin më tepër. Parashqevia shumë e zgjuar, brenda brishtësisë kishte fjalor shumë të edukuar…Kërkoi ndihmë që ti siguroja vizën te ambasada italiane për të shkuar në Itali. Donte të shkonte dhe të konfirmonte talentin e saj jashtë. Ëndrra amerikane shumë e bukur në romane, por ka dhe viktimat e saj.
