Gazetare: Ajnur Bafqari
Jo vetëm me vonesa, por autobusët e Ndërmarrjes së Qarkullimit Publik, po digjen rrugëve të Shkupit.
Në Butel 2, në afërsi të ish Kino Butelit, një autobus ka shpërthyer në flakë e tym, përfshi edhe në ambientet e brendshme, duke krijuar panik.
Dhjetëra qytetarë vrapuan në ndihmë të shuarjes së tij, ndërkohë që temperatura e brendshme nga zjarri kishte çuar në plasaritjen e xhamave si dhe në ngritjen e shtëllungave të tymit.
Ende është e paqartë mënyra se si autobusi është përfshirë nga zjarri, dhe nëse në momentin e rënies së tij kishte qytetarë, ndërkohë që për shkak të defekteve dhe vjetërsisë së tyre, 20 autobusë veçse u tërhoqën ditë më parë nga qarkullimi.
Në këto pamje që po shihni, autobusit të përfshirë nga flakët, i ka ardhur në ndihmë një tjetër autobus i vjetër, për ta tërhequr nga vendi i ngjarjes.
“Jo vetëm që ka mungesë të tyre por edhe ato autobusë që janë në trafik pësojnë aksidente si pasojë e defekteve që kanë. I fundit është rasti me autobusin me numër 71, I cili gjatë ditës së sotme është përfshirë nga flakët”, raporton gazetarja e Alsat, Ajnur Bafqari.
Qytetarët që anketuam pranë vendit të ngjarjes thonë se po ndihen çdo ditë e më pak të sigurt të udhëtojnë me autobusët publikë.
Shumë prej tyre janë me defekte, pa kondicionerë, ndërkohë që për shkak të grevës dhe mospagesës së borxheve, një pjesë e madhe e tyre punojnë me orare të kufizuara.
“Çfarë të sigurte, a e sheh si prishen, marrin flakë, kallen, tymi na mbyti këtu, çfarë të sigurt me këto. Gjithmonë ka probleme me këto autobusë, edhe me shoferët kemi probleme. Jemi me lokale këtu, I lënë autobusët, kallën djegen. Sdi çfarë të them… Me autobusë nuk jam I sigurt, se edhe shoferët nuk I kemi të mirë, edhe autobusët nuk janë të mirë….”, tha një qytetar.
“Nuk janë të rregullt, ja 20 minuta prita 57-tën, njërën prej linjave më të rregullta… Nuk janë të sigurtë, ndoshta se si i servizojnë në NQP. Unë po flisja për çështjen e parregullsisë. Shihet qartë nuk jemi të sigurt”, u shpreh një qytetare.
Ndërkohë, edhe 2 javë më parë, një tjetër autobus 2-katësh ishte përfshirë në flakë nën stacionin hekurudhor.
Në vazhdën e problemeve dhe vjetërsisë, në fillim të muajit, në afërsi të qendrës Mavrovasja, një tjetër autobus u aksidentua duke u përplasur me bordurën prej betoni. Shoferi u ankua se pedali i frenave nuk kishte funksionuar./ Alsat.mk
