Kryeministri Edi Rama ka kërkuar pezullimin urgjent të veprimtarisë së Autoritetit Kombëtar të Ushqimit, duke theksuar se ky institucion po shkakton më shumë dëme sesa dobi për sektorin e bujqësisë dhe tregtinë ushqimore në vend.
Gjatë fjalës përmbyllëse në Ditën e Parë të dialogut mes fermerëve dhe sipërmarrësve në bujqësi, Rama u shpreh se AKU-ja “duhet ndaluar me urgjencë që të vazhdojë të veprojë sepse më shumë se sa bën mirë, bën dëm”.
Kryeministri nënvizoi nevojën për ngritjen e një komisioni të posaçëm që do të analizojë burimet njerëzore të AKU-së, si dhe procesin e seleksionimit të inspektorëve që do të angazhohen në fushën e inspektimit, në kuadër të bashkimit të inspektorateve të ndryshme sipas ligjit.
Në këtë komision do të përfshihet edhe Universiteti Bujqësor i Tiranës, për të bërë një vlerësim të detajuar dhe serioz të stafit të AKU-së.
“AKU-ja është shqetësimi më i madh për sipërmarrësit në sektorin e bujqësisë, por edhe për restorantet, kafenetë dhe pikat e tregtimit, sepse më shumë se sa bën mirë, bën dëm,” tha Rama.
Rama: Duhet menjëherë të pezullohet veprimtaria e AKU-së. AKU-ja duhet ndaluar me urgjencë që të vazhdoje të veprojë sepse me shumë se sa mirë, bën dëm. Duhet pezulluar, duhet ngritur një komision i posaçme për të marrë në analizë të gjitha burimet njerëzore të AKU-së dhe procesi i bashkimit të atyre inspektorateve të ndryshme që është vendosur më ligj, duhet të kalojë nga një proces i seleksonimit të burimeve njerëzore që do merren me inspektim.
Këtu në komision duhet të jetë pjesë, duhet të ftohet Universiteti Bujqësor i Tiranës për të bërë një vlerësim serioz të burimeve njerëzore të AKU-së.
AKU-ja është shqetësimi më i madhi, në vend që të jetë partneri më i i rëndësishëm, është shqetësimi i sipërmarrësve që janë në sektorin e bujqësisë, por është shqetësim edhe për të gjithë restorantet, kafenetë dhe pikat e tregtimit, sepse më shumë se sa bën mirë bën dëm. Ministër, duhet nxjerr urdhër i pezullimit të veprimtarisë së AKU-së totalisht, nuk duhet të dalin dhe të shkojnë asgjëkund.
