Katër raste të sulmeve ndaj grave kanë ndodhur në 24 orët e fundit, sipas Policisë.
E ky është akti i ngacmimit që ndodhi në Prishtinë, gjatë pasdites së të mërkurës, raporton KTV.
Mirëpo, nuk është i vetmi që ndodhi në rrugën “Mark Isaku” të lagjes Tophane.
Edhe gjatë muajve të kaluar, sipas banorëve, i njëjti burrë që duket rreth të 30-ve po sulmon gratë në këtë mënyrë.
Kjo ka nxitur banorët që të raportojnë rastin në Polici.
Për ta, mbetet shqetësim fakti që nuk e njohin sulmuesin e që i njëjti akt po përsëritet.
Ndërkaq, asnjë nga të tri viktimat nuk e ka raportuar rastin në Polici.
E, sipas Luljeta Demollit, ende në shoqëri ekziston frika e grave që rastet e tilla të raportohen tek institucionet.
Nga Policia thonë që ende nuk e kanë identifikuar sulmuesin.
“Për këtë ngjarje jemi njoftuar me datën 24 korrik 2019, rreth orës 13:00. Informata është duke u trajtuar nga ana e hetuesve policorë, të cilët aktualisht janë duke punuar për identifikimin dhe arrestimin e personit të dyshuar”, thuhet në njoftimin nga Zyra për media e Policisë.
Ndërkaq, javët e fundit janë shtuar edhe rastet e ngacmimeve e dhunimeve seksuale.
Një grua, të mërkurën, ka raportuar se në muajin qershor një burrë e kishte futur në veturën e tij në Veternik dhe pastaj, pa dëshirën e saj, e kishte dërguar në një motel ku e kishte dhunuar, e kishte incizuar dhe ia kishte vjedhur disa dokumente e një shumë parash.
E një rast i ngjashëm kishte ndodhur ditë më parë në Gjakovë, ku një grua u dhunua dhe pastaj dhunuesi e kishte kërcënuar që të mos e raportonte rastin.
