Ndonëse ishte paralajmëruar të ksihte një takim mes presidentit të Shqipërisë, Bajram Begajt dhe kryetarit të Lidhjes Demokratike të Kosovës, Lumir Abdixhikut, nuk ndodhi.
Lidhur me mosbajtjen e këtij takimi Zyra për Informim e LDK-së ka dhënë një sqarim.
“Lajmi gjoja se sot kryetari i LDK-së, Lumir Abdixhiku është takuar me presidentin e Shqipërisë, në zyrat e Kuvendit, nuk është i vërtetë”, thonë në LDK.
Presidenti i Shqipërisë, Bajram Begaj, s’ka pranuar t’i takojë udhëheqësit e LDK-së në selinë e partisë së tyre. Kurse LDK s’kanë pranuar ta takojnë Begajn në ambiente të tjera.
Begaj sot është takuar me drejtuesit e partive opozitare të PDK-së dhe të AAK-së, si dhe me përfaqësues të partive minoritare në hapsirat e Kuvendit të Kosovës.
Vizita e Begajt në Kosovë ka nisur dje ku është pritur me nderime shtetërore nga presidentja e vendit Vjosa Osmani. Përveç Osmanit, Begaj ka takuar edhe kreun e ekzekutivit Albin Kurtin.
Gjatë qëndrimit në ditën e parë në Prishtinë presidenti i Shqipërisë ka deklaruar se të dy vendet ndajnë aspiratat e njëjta drejt rrugës evropiane. Ai ka thënë se Shqipëria e mbështet Kosovën drejt Bashkimit Evropian dhe NATO-s ndërsa ka theksuar se do të jetë zëri i Kosovës aty ku i jepet mundësia.
Gjatë ditës se djeshme presidenti i Shqipërisë ka bërë homazhe pranë varrit të presidentit historik Ibrahim Rugova si dhe familjes Jashari në Prekaz.
