Është viti i katërt që Armend Kocaj ndërrimin e motmoteve e pret në vendin e tij të punës.
Kocaj, që prej kohësh është i punësuar si zjarrfikës në Prizren, pohon që do të donte të ishte me familjen, por thotë se puna që bën nuk ka orar dhe se ndihet krenar që është në shërbim të popullit, raporton KTV.
Zjarrfikësit, pesë sa ishin në turnin e natës, thonë se ky numër është shumë i vogël në krahasim me rastet që ballafaqohen ata, por shpresojnë që në vitin 2017 të rritet numri i punëtorëve.
Pas vizitës së bërë zjarrfikësve, ekipi ynë zbriti edhe në “Shadërvan” për të parë se si po festohej pritja e vitit të ri.
Numër i vogël i qytetarëve të Prizrenit kanë zgjedhur sheshin “Shadërvan” që të presin ndërrimin e motmoteve, duke uruar që viti 2017 të jetë shumë më i mirë se ai parapraku.
Komuna e Prizrenit, ashtu si viteve të kaluara, nuk kishte organizuar ndonjë aktivitet për ta shënuar ndërrimin e motmoteve, përveç dekoreve të zakonshme.
Festimet në këtë qytet kanë kaluar pa ndonjë incident.
© KOHA.
