Shkruan: Emad Mehmeti
Ka shumë shkaqe, por po i numëroj tre shkaqe qe sipas meje janë kryesore.
Shkaku i parë është kaosi urbanistik dhe infrastrukturor në të cilin gjendet komuna. Partia që e ka udhëhequr këtë komunë tani e katër mandate lavdërohet me suskese dhe të arritura të mëdha, mirëpo ne që kalojmë shpesh rrugët e saj, e dimë si është gjendja reale. Për të kaluar pesëqind metra distancë me veturë, nevojiten 20-30 minuta shkaku i kolonave të gjata. Rrugët poashtu janë me gropa, sinjalizimi horizontal është në gjendje të keqe, kurse nga mungesa e parkingjeve, veturat parkohen rrugëve. Krejt këto nuk krijojnë kushet që një ambasadë e huaj të mund të funksionojë në territorin e Çairit.
Shkaku i dytë është niveli i lartë i krimit. Nuk ka reforma të theksuara brenda policisë së Çairit edhe pse ka treguar rezultate të dobëta në luftën kundër krimit. Për këtë arsye, pjesa më e madhe e Çairi nuk gjendet as në hartën e diplomatëve dhe turistëve për t’i viztuar, e lëre më për të jetuar. Edhe pse çairi është komuna qendrore e Shkupit, diplomatët e huaj paguajnë qera të majme në komunat tjera të qytetit, ku siguria është në nivel më të lartë, kurse infrastruktura më e rregulluar.
Shkaku i tretë është ndarja e dëmshme territoriale, që nga Çairi ka krijuar një komunë të getoizuar. Me këtë ndarje, Çairit i janë marë pjesët më të bukura të saj, ku do të mund të vendoseshin ambasada ose konsullate, si pasojë, tanimë në vend se edhe Kalaja, ku gjendet ambasada amerikane, të jetë brenda Çairit, në këtë komunë nuk gjenden as ambasadat e Kosovës dhe Shqipërisë. Sa keq!/Shkrimi është shkruar enkas për Lideri.mk
