Qeveria e re bullgare do të mbajë qëndrimin e saj të vetëm për Maqedoninë e Veriut, sipas seksionit të politikës së jashtme të marrëveshjes së koalicionit të partive që përbëjnë shumicën e re parlamentare dhe qeveritare. Në shtojcën e dokumentit, siç raportojnë mediat bullgare, thuhet se marrëdhëniet do të përmirësohen “në një frymë konstruktive” dhe përshkruan hapat që duhet të ndërmerren.
– Advertisements –
Hapi i parë është aktivizimi i punës së komisioneve dypalëshe të parashikuara në Marrëveshjen e Miqësisë, Fqinjësisë së Mirë dhe Bashkëpunimit nëpërmjet një kalendari takimesh mujore. Është planifikuar krijimi i komisioneve të biznesit. Një hap tjetër është intensifikimi i bashkëpunimit në fushën e transportit, duke përfshirë lidhjen direkte ajrore Sofje-Shkup, ndërtimin e Korridorit 8, mbështetjen financiare për lidhjen hekurudhore. Parashikohet intensifikimi i bashkëpunimit në fushën e shkencës dhe kulturës (kalendar i përbashkët kulturor, konferenca të përbashkëta shkencore).
Mënyra të tjera në të cilat do të punohet për afrim me Shkupin janë: vazhdimi i punës së Komisionit të Përbashkët Multidisiplinar të Ekspertëve për Çështje Historike dhe Arsimore. Bullgaria pret që autoritetet e Republikës së Maqedonisë së Veriut të ofrojnë mbrojtje të përhershme kundër diskriminimit dhe të drejta të barabarta të qytetarëve maqedonas me identitet bullgar si pjesë përbërëse e vlerave evropiane, shkëmbimi i arkivave të periudhës 1944-1991 me qëllim rehabilitimin e viktimave të represionit, aktivizimi i diplomacisë publike si mjet, përkrahja e integrimit të Republikës së Maqedonisë së Veriut në BE përmes bartjes së përvojave bullgare.
