Numri i të vdekurve nga sulmet e reja të Izraelit në Rripin e Gazës që filluan më 18 mars, është rritur në të paktën 710, me 240 viktima të reja, njoftoi Ministria e Shëndetësisë në enklavën palestineze, transmeton Anadolu.
Zëdhënësi i Ministrisë së Shëndetësisë në Gaza, Khalil Dakran, tha në një deklaratë se 710 persona janë vrarë dhe më shumë se 900 janë plagosur në sulmet izraelite në Rripin e Gazës, të cilat kanë vazhduar që nga e marta.
Ai theksoi se shumë njerëz të plagosur nga sulmet izraelite kanë humbur jetën si pasojë e mungesës së ndihmës mjekësore urgjente, pajisjeve bazë dhe ilaçeve për shkak të bllokadës izraelite.
Zyrtari palestinez njoftoi gjithashtu se 70 për qind e të plagosurve janë fëmijë dhe gra, dhe shumica e tyre janë në gjendje të rëndë.
Ushtria izraelite rinisi sulmet e dhunshme në Rripin e Gazës të martën, duke shkelur armëpushimin që hyri në fuqi më 19 janar.
Në përgjithësi, gati 50 mijë palestinezë janë vrarë, kryesisht gra dhe fëmijë, dhe mbi 112 mijë të tjerë janë plagosur në fushatën brutale ushtarake izraelite në Gaza që nga tetori i vitit 2023.
Në nëntor 2024, Gjykata Ndërkombëtare Penale lëshoi urdhra arresti për kryeministrin Benjamin Netanyahun dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
