Deklaratat e bëra nga zëvendës ndihmësi sekretari amerikan i shtetit janë deri tani “presioni më i vështirë publik dhe shumë jodiplomatik në vendin tonë deri më sot”.
Ky ishte reagimi i ministrit serb të mbrojtjes Aleksandar Vulin ndaj vërejtjeve të Hoyt Brian Yee të bërë të hënën në Beograd, ku ai mori pjesë në Samitin e 17-të Ekonomik Serb, raporton “b92”, transmeton Periskopi.
Sipas Vulin, deklaratat e Yee përfaqësojnë “presion mbi të drejtën tonë për të vendosur në mënyrë të pavarur”.
“Nuk e di se cili do të jetë pozicioni i presidentit të Serbisë Aleksandar Vuçiq, por jam i sigurt se ai do të jetë në gjendje të përballojë presionet siç ka bërë gjithmonë”, tha Vulin në një deklaratë për “Tanjug”.
“Por në emrin tim,” vazhdoi ministri, “mund të them se ato nuk janë deklarata që vijnë nga një mik dhe një njeri që respekton Serbinë, që respekton politikën tonë, i cili respekton të drejtën tonë për të vendosur.”
“Serbia do të marrë vendimet e veta, pavarësisht sa të mëdha janë ata që mendojnë se mund të vendosin për ne”, përfundoi Vulin.
Zyrtari i lartë i Departamentit të Shtetit të SHBA’së, Hoyt Brian Yee, tha më parë se vendi i tij “nuk e kupton” pse personeli humanitar rus në Qendrën humanitare ruse-serbe duhet të marrë imunitet diplomatik.
Ai vuri në dukje se kjo nuk ishte “një normë në bashkësinë ndërkombëtare”.
Përveç kësaj, duke iu referuar njoftimeve të fundit se disa gjeneralë me përvojë të luftës nga Kosova do të jepnin mësim në Akademinë Ushtarake në Beograd, Yee tha se “për dikë që dënohet për krime lufte të jetë pedagog në një akademi ushtarake, nuk është shenjë e mirë e vendosmërisë së qeverisë për të ndëshkuar krimet e luftës”.
Zyrtari amerikan gjithashtu deklaroi se vendet që duan anëtarësimin në BE “duhet ta tregojnë qartë këtë.”
Ai tha se këto vende “nuk mund të balancojnë mes dy palëve”, dhe shtoi se SHBA është “një partner për Serbinë në rrugën e saj drejt Bashkimit”.
Sipas tij, këto vende duhet të zgjedhin njëra anë, “pa marrë parasysh sa e vështirë mund të jetë”./Periskopi/
