Pushtimi rus në Ukrainë po hyn në javën e katërt. Ushtarët lënë pas humbje jetë, të plagosur dhe shkatërrim. Qytetarët ukrainas po evakuohen mes plumbave që fluturojnë dhe bombardimet që nuk kanë të ndalur.
Popullsia e Ukrainës përbëhej nga më shumë se 43 milionë njerëz. Mbi 3 milionë njerëz janë larguar nga Ukraina që nga pushtimi, sipas Agjencisë së Kombeve të Bashkuara për Refugjatët, me shumicën e atyre refugjatëve që shkojnë në Poloni, Rumani, Moldavi, Hungari dhe Sllovaki.
Në javën e parë, më shumë se një milion refugjatë nga Ukraina kaluan kufijtë në vendet fqinje dhe shumë të tjerë janë në lëvizje brenda dhe jashtë vendit. Ata kanë nevojë për mbrojtje dhe mbështetje. Ndërsa situata vazhdon të shpaloset, rreth 4 milionë njerëz mund të largohen nga Ukraina, thotë Agjencia e OKB-së për refugjatët.
Ku po gjejnë strehim këta shtetas që vrapojnë për jetën?
Mbi 300 ukrainas kanë ardhur në Shqipëri
Ministri i Brendshëm, Bledi Çuçi ka deklaruar se Shqipëria do të strehojë 351 ukrainas qe janë larguar nga lufta. Vlora është kthyer së fundmi në destinacion pritës për ukrainasit, të cilët e kanë vizituar më herët Shqipërinë për pushime.
Dhjetëra familje kanë mbërritur gjatë ditëve të fundit në zyrën e emigracionit në pikën kufitare të portit të Vlorës. Ata theksojnë se kanë rrugëtuar nëpër disa shtete deri sa të mbërrinin në destinacionin e tyre, Shqipërinë. Qëndrimi në Kiev është shumë i rrezikshëm thekson Ksenia Breus.
Familjet e para në Vlorë i ka pritur një tjetër ukrainas. Anzar Popov jeton prej disa muajsh në qytetin bregdetar shqiptar.
“Unë jetoj në Vlorë prej gjysmë viti. Më pëlqen ky qytet dhe e dua Shqipërinë. Mamaja ime jeton në një fshat të Kievit, xhaxhai im është në Kiev po ashtu, situata është shumë e keqe, pasi raketat balistike ruse kanë shkatërruar qytetin. Është e vështirë t’i marr të afërmit e mi në Vlorë, pasi në Kiev dhe Kahrkhiv janë zona të nxehta dhe ka luftime me armë të rënda. Ka mungesë të naftës dhe benzinës dhe është e vështirë që të nisesh me makinë, pasi avionët janë bllokuar. Disa prej njerëzve që janë nisur me makina, janë vrarë, është situatë e rrezikshme”, tregon ai.
Shqipëria ka në fuqi hyrjen më vizë për shtetet e Lindjes së Evropës, përfshirë edhe Ukrainën. Gjatë sezonit të kaluar turistik, në Vlorë u akomoduan rreth 25.000 mijë ukrainas. Sipas drejtorit të Kufirit dhe Migracionit në Vlorë, Shpëtim Hasanaliaj, ata që do të kërkojnë strehim, do të akomodohen në një rezidencë (kamp) në Sarandë të ngritur nga Karitasi.
Mbi 1.9 milionë refugjatë kanë hyrë në Poloni nga Ukraina
Sipas të dhënave të bëra publike nga CNN, më shumë se 1.9 milionë refugjatë kanë hyrë në Poloni nga Ukraina që kur Rusia pushtoi vendin më 24 shkurt, tha agjencia e Gardës Kufitare të vendit në një postim në Tëitter të mërkurën.
Nga ato:
Rreth 593,000 njerëz, ose 31% e refugjatëve, kanë hyrë në Poloni me makina pasagjerësh.
Rreth 440,000 njerëz, ose 23%, kanë hyrë me autobusë.
Rreth 402,000, ose 21%, kanë hyrë në këmbë.
Dhe rreth 210,000, ose 11%, hynë me trena, sipas agjencisë së Rojës Kufitare të vendit.
Mbi 187,000 refugjatë ukrainas kanë mbërritur në Gjermani
Më shumë se 187,000 refugjatë të arratisur nga lufta në Ukrainë kanë mbërritur në Gjermani, sipas Ministrisë së Brendshme gjermane, raportojnë mediat ndërkombëtare.
Deri të enjten, 187,428 refugjatë ishin regjistruar nga policia gjermane, por numri aktual i refugjatëve që vijnë mund të jetë dukshëm më i lartë për shkak të mungesës së kontrolleve kufitare midis Polonisë dhe Gjermanisë, tha një zëdhënës i ministrisë së brendshme për CNN.
Shumica e refugjatëve që mbërrijnë në Gjermani janë gra, fëmijë dhe të moshuar, tha zëdhënësi.
Organizata Ndërkombëtare për Migracionin vlerësoi të hënën se më shumë 2.8 milionë njerëz janë larguar nga Ukraina që nga fillimi i pushtimit në fund të shkurtit.
