Të gjithë shqiptarët po mundohen me “mish e me shpirt” vetëm të ikin nga Shqipëria! Aq e madhe është kjo “dëshirë” sa që për ta pasur sa më të sigurtë largimin, njerëzit po shpikin gjithë farë skemash, e madje po kthehen edhe pse e besytnive.
I tillë është dhe fenomeni i fundit që ka lindur me Lotarinë Amerikane dhe thashethemin se korçarët kanë më shumë shanse ta fitojnë. Vitet e fundit, Korça ka fituar gjithnjë e më shumë reputacionin e qytetit nga ku emigrojnë më shumë shtetas shqiptar në SHBA duke fituar lotarinë amerikane.
Edhe ky muaj tetor pati shumë të interesuar, madje një fenomen që u vu re ishte se nga Korça zgjodhën të aplikonin edhe vizitorë nga qytetet e tjera të Shqipërisë, me shpresën se nga ky qytet kanë një mundësi më tepër për t’u përzgjedhur si fitues.
Fotografia e aplikimit është specifike dhe çon në skualifikim të menjëhershëm nëse nuk ka standardin e kërkuar, ndaj muaji i lotarisë sjell më shumë klientë në studiot fotografike.
Vetëm në një studio të tillë gjatë muajit tetor në korcë numëroheshin të paktën 100 aplikime në ditë.
Gjatë 2017-s më shumë se 22.4 milionë njerëz aplikuan në të gjithë botën në programin e vizave amerikane, i cili jep rreth 50 mijë Green Cards, apo leje qëndrimi të përhershme nëpërmjet një sistemi lotarie. Shqipëria arriti numrin rekord mes vendeve të Europës me 367 mijë aplikime.
