Shtetet e Bashkuara të Amerikës kanë reaguar lidhur me tensionet e fundit mes Kosovës dhe Serbisë, duke përkrahur veprimin e institucioneve të Kosovës për ta parandaluar futjen e trenit ilegal serb.
J. Michelle Schohn, zëdhënësja e Ambasadës së SHBA-së në Prishtinë, ka thënë për “Kohën Ditore” se e respektojnë të drejtën e Kosovës që të menaxhojë kufijtë e vet.
Na vjen mirë që mbrëmë nuk kishte konfrontime në kufi”, ka thënë Schohn.
Ajo ka shtuar se SHBA-ja përkrah fuqishëm dialogun e moderuar nga BE-ja “si mënyrën më të mirë për të ecur përpara në marrëdhëniet mes Kosovës dhe Serbisë”.
Së fundi janë rritur zërat që thonë se obstruksionet e Serbisë vijnë pas ndryshimeve në administratën e SHBA-së, ku serbët llogarisin në përkrahjen e presidentit të ri amerikan, Donald Trump.
E pyetur për mundësinë e ndryshimit të kursit amerikan në raport me Kosovën, me ardhjen e Trumpit, zëdhënësja e Ambasadës amerikane në Prishtinë ka përmendur vazhdimësinë e politikës amerikane në Ballkan.
“Politika e SHBA-së lidhur me Ballkanin në dy dekadat e fundit ka qenë relativisht konsistente pa marrë parasysh se cila parti ka qenë në Shtëpinë e Bardhë. Nuk kemi parë asnjë indikacion se kjo do të ndryshojë”, ka thënë Schohn. /albeu.com/
