Presidenti i Kosovës është lajmëruar nga Londra, ai pas takimit me Sir Alan Duncan, Ministër për Evropë dhe Amerikë në qeverinë britanike, ka bërë të ditur se angazhimet për të përmbyllur procesin e transformimit të Forcës së Sigurisë së Kosovës janë në fazën përfundimtare.
Thaçi dhe Duncan kanë folur për përpjekjet për ndërtimin e paqes së qëndrueshme në Kosovë dhe rajon, ai ka thënë se shumë shpejt do të arrihet një marrëveshje përfundimtare me Serbinë.
“Kosova ka bërë hapa të mëdhenj në reforma dhe është e interesuar që të vazhdojë me këta hapa edhe në të ardhmen, po punojmë edhe për një marrëveshje paqësore, gjithëpërfshirëse dhe përfundimtare me Serbinë”, ka shtuar Thaçi.
Në anën tjetër, Duncan ka thënë se Britania e Madhe mbështet perspektivën euroatlantike të Kosovës dhe të rajonit.
Me Duncanin, Thaçi ka folur edhe për angazhimet për të përmbyllur procesin e transformimit të Forcës së Sigurisë së Kosovës, njofton Metro.
