Presidenti Ilir Meta risjell me rastin e Ditës Botërore të Poezisë, disa nga vargjet e “Anës Lumenjve” të figurës shumëdimensionale Fan Noli.
Në një postim në “Facebook”, Meta e konsideron një nga poezitë më popullore dhe të dashura, ndërsa nuk ngurron ta aktualizojë.
“Vrulli shpërthyes i vargjeve të saj gjëmon me një forcë të jashtëzakonshme sa herë tirania, dhuna, shtypja, padrejtësitë dhe aktet antikombëtare bëhen të padurueshme dhe revoltuese për mbarë popullin, që nga Shkodra e gjer në Vlorë”, – shkruan Meta.
Kreu i shtetit lë të nënkuptohet se i referohet qëndrimit që do të mbajnë qytetarët më 25 Prill, përballë kutive të votimit.
Postimi i presidentit Ilir Meta në “Facebook”:
“Anës lumenjve”, një nga krijimet më të arrira të Fan Nolit, është padyshim një nga poezitë më popullore dhe më të dashura për çdo shqiptar të ndershëm e patriot të çdo epoke.
Vrulli shpërthyes i vargjeve të saj gjëmon me një forcë të jashtëzakonshme sa herë tirania, dhuna, shtypja, zullmet, padrejtësitë dhe aktet antikombëtare bëhen të padurueshme dhe revoltuese për mbarë popullin, “që nga Shkodra e gjer në Vlorë”.
Me rastin e Ditës Botërore të Poezisë, risjell sot disa nga vargjet e kësaj poezie, të interpretuara mjeshtërisht nga artisti ynë i madh Timo Flloko.
