Gazetar: Adnan Qaili
Qytetarët presin radhën me vetura, ndërsa ministri vjen me helikopter. Kjo kontradiktë u pa sot në vendkalimin kufitar të Tabanocës ku Ministri i brendshëm Toshkovski priti homologun e tij serb Daçiq. Ata u shpërndanë ujë kalimtarëve, të cilët prisnin radhën në këtë vapë por nuk dëftuan se përse nuk funksionon si duhet sistemi njësportelësh në menaxhimin e integruar të kufijve serbo-maqedonas, i cili u bë pikërisht për të ulur fluksin e tejzgjatur të pritjeve në kufi, madje edhe për turistët që kalojnë tranzit.
“Udhëtarët, të cilët nga Serbia kaluan përmes vendkalimit kufitar të Tabanocës në Maqedoni ishin sot me fat, jo që nuk kishte kolona të gjata por puna ecën shpejtë për shkak se të pranishëm ishin dy ministrat e dy shteteve në vizitë, a përndryshe në një ditë të zakonshme vere pritjet janë nga dy deri në tri orë”, raporton Adnan Qaili, Gazetar.
Udhëtarët që anketuam thanë se sot kanë pritur jo më shumë se një çerek ore.
“Ku do të shkoni për pushime? Në Greqi! Përse jo në Maqedoni, ne kemi liqene? Po, nuk keni deti! Në kufi si kaluat a keni pritur shumë? Tani për tani shumë mirë! A vini shpesh këtej? Kjo është hera jonë e parë!”, tha njl udhëtar.
Ministri i brendshëm Pançe Toshkovski tha se nga viti i ardhshëm do të modernizojnë akoma më tepër digjitalizimin e vendkalimeve kufitare me sistemin e integruar të të dhënave ndërmjet dy vendeve.
“Nëse ju them po, do të gënjeja, a ju e dini që nuk mundem kështu. Shpresoj që sa më shpejtë do të thjeshtësojmë procedurën për qarkullimin e automjeteve që frekuentojnë këtu. Edhe ne nuk duam kaq shumë kolona të gjata të pritjes që shkaktojnë nervozizëm… edhe ne duam sa më shpejtë të kalojmë”, deklaroi Pançe Toshkovski, Ministër i punëve të brendshme.
Në takimin zyrtar, ministrat e brendshëm të Maqedonisë së Veriut dhe Serbisë u zotuan se do të bisedojnë edhe për hapjen e kufirit Llojan-Miratocë, i cili prej disa vitesh është ngritur edhe në nivel kryeministrash. Aktualisht, ai vendkalim i mbyllur ruhet 24/7 nga forca policore kufitare nga të dyja anët, por asnjëherë nuk është lëshuar në përdorim me arsyetimin se ka shpenzime të shumta për të angazhuar zyrtarë policorë dhe doganierë për vendosjen e tij në funksion.
