Edhe pse prej vitesh është artikuluar se Turqia është një ndër partnerët strategjikë të Shqipërisë, deri më sot ende nuk ka një dokument që formalizon këtë partneritet.
Por, gjatë vizitës së tij zyrtare në Ankara, ministri i Jashtëm, Ditmir Bushati në takim me homologun e tij, Mevlut Cavushoglu, është rënë dakord për nënshkrimin sa më të shpejtë të kësaj marrëveshjeje, si dhe pasimin e saj me një mbledhje të përbashkët të qeverive të të dy vendeve.
Nga ana e saj, Turqia është shprehur e gatshme që të rrisë kontributin dhe asistencën në turizëm, energji, mbrojtje, siguri apo edhe bashkëpunim policor.
Mësohet se kreu i diplomacisë shqiptare ka shprehur angazhimin për të punuar me Turqinë si dy vende mike dhe aleate, por në përputhje me praktikat më të mira në këtë fushë si dhe duke respektuar procedurat e brendshme të Shqipërisë.
Ministri Bushati është pritur edhe nga Presidenti i Turqisë, Rexhep Taip Erdogan në orët e mbrëmjes së të mërkurës, raporton “Top Channel”.
Ndërkaq, më herët, gjatë ditës ministri i Jashtëm Ditmir Bushati është takuar edhe me kryeministrin Binali Yildirim dhe me kryetarin e Asamblesë së Turqisë, Ismail Kahraman. Gjithashtu ai ka zhvilluar homazhe dhe në Mauzoleumin e Mustafa Qemal Ataturkut.
