Fituesi i Çmimit Nobel për Mjekësi, John Sulston një nga figurat e shquara të deshifrimit të gjenomit njerëzor vdiq në moshën 75-vjeçare, njoftoi të premten Instituti që ai themeloi.
Mike Stratton, drejtori i ‘Wellcome Sanger Institute’ e përshkroi profesorin si një njeri të madh të shkencës dhe lider vizionar, raporton ATSH.
John Sulston u nderua në vitin 2002 me Çmimin Nobel në Mjekësi së bashku me kolegun e tij britanik, Sydney Brenner dhe amerikanin, Robert Horvitz për zbulimin e tyre mjaft të rëndësishëm mbi rregullimin gjenetik të zhvillimit të organeve dhe vdekjes së programuar të qelizave.
Zbulimi i tyre përbën një kontribut jetësor në studimet që hedhin dritë mbi sëmundjen e kancerit.
Por Sulston ishte ndoshta më tepër i njohur për rolin kyç të Britanisë së Madhe në një projekt ndërkombëtar që kishte si objektiv paraqitjen e gjenomit njerëzor dhe ndikimet e tij, në mënyrë që këto të dhëna të jenë në shërbim të publikut të gjerë.
