Presidenti Trump sapo përfundoi një udhëtim të dytë jashtë shtetit për të avancuar më tej interesat dhe vlerat e Amerikës dhe për të forcuar aleancat tona në mbarë botën. Të dyja këto dhe udhëtimi i tij i parë treguan ringjalljen e lidershipit amerikan për të forcuar interesat e përbashkëta, për të afirmuar vlerat e përbashkëta, për të përballuar kërcënimet e përbashkëta dhe për të arritur prosperitetin e rinovuar.
Diskutimet me udhëheqësit botërorë treguan potencial të jashtëzakonshëm: furnizime të mëdha me energji të përballueshme, tregje të pashfrytëzuara që mund të hapen për tregti të reja, një numër në rritje i të rinjve që kërkojnë mundësinë për të ndërtuar të ardhme më të mirë në vendet e tyre dhe partneritete të reja mes kombeve që mund të formojnë bazën për paqe të qëndrueshme. Në çdo rast jashtë vendit, Presidenti Trump artikuloi vizionin e tij për sigurimin e atdheut amerikan, duke rritur prosperitetin amerikan dhe duke avancuar ndikimin amerikan.
Takimet në Poloni dhe në konferencën e Grupit të 20-ëve në samitin në Gjermani, u përqendruan në ndërtimin e koalicioneve për të arritur rezultatet më të mira të mundshme për Amerikën dhe për aleatët tanë. Shtetet e Bashkuara nuk mund të jenë anëtare pasive e organizatave ndërkombëtare. Ne jemi duke punuar me miqtë për t’u ballafaquar me kërcënimet e përbashkëta, për të kapur mundësitë reciprokisht të dobishme dhe për të kërkuar zgjidhje për problemet e përbashkëta.
Në Varshavë, presidenti Trump i foli popullit polak dhe përsëriti angazhimin tonë për mbështetjen e ndërsjellë dhe mbrojtjen e Polonisë dhe aleatëve tanë të NATO-s kundër kërcënimeve të përbashkëta. Ai pohoi se një “Poloni e fortë është një bekim për Evropën” dhe se “një Evropë e fortë është një bekim për Perëndimin dhe botën”.
Ai u takua gjithashtu me 12 udhëheqës të kombeve të “Three Seas” dhe premtoi angazhimin e Amerikës për zgjerimin e qasjes në energji të përballueshme dhe të besueshme në shtetet baltike, Evropën Qendrore dhe Ballkanin. Ndihma e vendeve për të diversifikuar burimet e tyre të energjisë forcon ekonomitë, krijon vende pune dhe parandalon kundërshtarët nga përdorimi i energjisë për ti frikësuar ose për detyruar. Gjatë një darke Presidenti Trump priti Presidentin Moon Jae-in të Koresë së Jugut dhe Kryeministrin Shinzo Abe të Japonisë në Hamburg, liderët ranë dakord mbi një strategji të përbashkët për të përballuar kërcënimin e Koresë së Veriut dhe për të siguruar sigurinë e Azisë Verilindore dhe Shteteve të Bashkuara .
Qasja qendrore për Presidentin Trump është se Shtetet e Bashkuara do të kërkojnë fusha të marrëveshjes dhe bashkëpunimit, që mbrojnë ende interesat amerikane. Në G-20, Shtetet e Bashkuara mbështetën tregtinë e hapur, por këmbëngulën që ajo të ishte e drejtë. Komunikata i G-20 e njohu “rëndësinë e tregtisë reciproke dhe reciprokisht të favorshme” dhe të gjithë liderët ranë dakord të bëjnë më shumë për të eleminuar kapacitetet e tepërta në sektorët industrialë si çeliku. Për shkak të lidershipit amerikan, të gjitha vendet G-20 u bashkuan së bashku për të bërë një thirrje urgjente “për heqjen e subvencioneve të shtrembëruara të tregut dhe llojeve të tjera të mbështetjes nga qeveritë” për të “nxitur një fushë të vërtetë të barabartë”.
Udhëheqësit e G-20 u pajtuan se një ekonomi e fortë dhe një planet i shëndetshëm po forcohet reciprokisht. Amerika do të vazhdojë të udhëheqë me shembull duke demonstruar se forcat e tregut dhe zgjidhjet e nxitura nga teknologjia janë mjeti më efektiv për mbrojtjen e mjedisit, duke ushqyer rritjen ekonomike.
Përsa i përket migracionit, udhëheqësit rikonfirmuan “të drejtën sovrane të shteteve për të menaxhuar dhe kontrolluar kufijtë e tyre”. Ata diskutuan nevojën për të “trajtuar shkaqet rrënjësore të zhvendosjes” dhe për të krijuar mundësi më të mira për njerëzit që të qëndrojnë në vendet e tyre të origjinës dhe të rindërtojnë komunitetet e tyre.
Ndoshta më e rëndësishmja, Presidenti Trump pohoi në këtë udhëtim se Amerika e para është e bazuar në vlerat amerikane – vlera që jo vetëm forcojnë Amerikën, por edhe nxisin përparimin në mbarë botën. Amerika e mbron dinjitetin e çdo personi, pohon barazinë e grave, mbështet risitë, mbron lirinë e fjalës dhe të fesë dhe mbështet tregjet e lira dhe të drejta.
Për shembull, për të ndihmuar fuqizimin e grave anembanë globit, Shtetet e Bashkuara u bashkuan me Bankën Botërore në një iniciativë për të siguruar më shumë se 1 miliard dollarë për të avancuar sipërmarrjen. Kjo përpjekje do të ndihmojë gratë në vendet në zhvillim që të fitojnë qasje më të madhe në kryeqëndra, tregje dhe rrjete të nevojshme për të filluar dhe për të rritur bizneset në ekonominë moderne. Dhe Shtetet e Bashkuara mbeten burimi i vetëm më i madh në botë i ndihmës humanitare. Në G-20, kemi kryer një shtesë prej 639 milionë dollarësh për të ndihmuar në shpëtimin e jetëve të miliona njerëzve të kërcënuar nga uria – dhe u kërkua kombeve të tjera që të bashkohen me ne për të bërë më shumë për të adresuar këtë katastrofë humanitare.
Sigurisht, Shtetet e Bashkuara – së bashku me kombet anembanë botës – vazhdojnë të përballen me sfida serioze, duke përfshirë kërcënimin e terrorizmit dhe kërcënimin e regjimeve mashtruese. Puna me kombet e tjera na lejon mundësinë më të mirë për t’i adresuar këto sfida. Për shembull, në një takim me Presidentin Joko Widodo të Indonezisë, kombi më i madh në botë me shumicë myslimane, dy udhëheqësit afirmuan angazhimin e bërë në Arabinë Saudite për të bllokuar financimin për terroristët dhe ata që avancojnë ideologjinë e tyre urryese. Në një komunikatë zyrtare mbi luftën kundër terrorizmit, të gjitha vendet e G-20 pohuan se ne “dënojmë me forcë të gjitha sulmet terroriste në mbarë botën dhe qëndrojmë të bashkuar dhe të palëkundur në luftën kundër terrorizmit dhe financimin e tij”. Në shumë diskutime me aleatët dhe partnerët në G-20, L]liderët ranë dakord se Koreja e Veriut është një kërcënim global që kërkon veprim kolektiv.
Amerika e para është e rrënjosur në besimin se vlerat tona janë të vlefshme pët t’u mbrojtur dhe promovuar. Kjo është një kohë me sfida të madhe për miqtë dhe aleatët tanë në mbarë globin – por është gjithashtu një moment i jashtëzakonshëm. Delegacioni amerikan u kthye nga udhëtimi me optimizëm të jashtëzakonshëm për të ardhmen dhe atë që Shtetet e Bashkuara, aleatët tanë dhe partnerët tanë mund të arrijnë së bashku.
